Kum hnih World Cup-ah coach-te rawn

National football team enkawltu coach-te chu kum hnih dana World Cup khelh chungchangah an ngaihdan sawina hun pek an ni a, nimin khan Arsene Wenger hnenah coach ṭhenkhat chuan an ngaihdan an sawi tawh a, October 21-ah he hun hi hawn leh a ni ang.

Football khawvela thuneitu sang ber FIFA hnuaia Chief of Global Football Development hna chelhtu Wenger hi kum hnih dana World Cup neih rawttu ber a ni a, online videoconference hmangin coach-te hi rawn an ni.

European football-a thuneitu sang ber UEFA leh European Clubs' Association chuan kum hnih dana World Cup neih hi an thlawp loh thu an lo sawi tawh a, International Olympic Committee pawhin infiamna khawvel a nghawng zauh dan tur ngaihtuaha inbiakrawnna uluk zawk neih a ṭul thu an lo sawi tawh bawk.

FIFA chuan kum hnih dana World Cup khelh ziah chuan ram tam tak tan football khawvela ram leh ram inelna sang ber khelhna chance a hawn zauhsak tur thu an sawi a, he an ruahmannaah hian qualifying match leh international break tih tlem a tel avangin player-te an zin tlem sawt dawn niin an sawi bawk a ni.

UEFA chuan kum hnih dana World Cup neih chu a tawp thlenga an do tur thu an sawi a, World Cup khelh zin lutuk chuan inelna hlutna a tihhniam an hlauh thu an sawi lang bawk.

Wenger hian, "Football-in hma a sawn theih nana 'risk' lak tum ka ni a, chu 'risk' la tur chuan ka inpeih tawh a ni," tiin a lo sawi tawh.

Arsenal boss hlui chuan, "Inbiakna hun hi kan nei tam thei lo a, mahse, kan neih chhun erawh kan hlut thiam a ngai. Hetiang anga inbiak hona hian football kan chawisanna kawngah min pui a, khawvel huap nih tir zel kan tumna kawngah a ṭangkai em em bawk a ni," a ti.

Kum hnih dan World Cup chungchangah hian hmeichhe coach-te pawh hmeichhe World Cup atana an ngaihdan zawh an ni a, vawi hnih ngawt hmeichhe World Cup-a USA lo champion pui tawhtu Jill Ellis chuan a ho thung.

FIFA technical advisory group hotu dinhmun luah mek Ellis hian kum hnih dana World Cup neih chu hmeichhe team tan pawh a ṭhat thu a lo sawi tawh a, mipa team puihna tel loa hmeichhe team te an kal theih phah tur thu sawiin, "Mipa puihna kan mamawh tlem sawt dawn a ni," a ti a, mipa team sum hmuh aṭanga hmeichhe team intung nung ṭhin chu kum hnih dana World Cup khelh hmanga tihbo theih a beisei.