Federer a hnung tawlh zel

A inkhel mumal thei lo rei tawh a, a inkhelh ṭum pawhin result ṭha a nei hleithei lo - Roger Federer chu world ranking chhuak thar berah 11-na a ni a, kum 2017 hnuah a sang zual 10 zinga a tel phak loh vawi khatna a ni.

Kum 40 mi Federer hi a khup ding lam hliam vangin a chawl mek. July thla khan Wimbledon a khel a, quarterfinal-ah Hubert Hurkacz a hneh lo, a hnu lamah Federer hi a la inkhel leh rih lo a ni. Poland tlangval Hurkacz erawhin mi pahnih kal kanin 10-na dinhmun a luah.

Season kal laia Grand Slam pathum chawitu Novak Djokovic chu fal takin a chung berah a la awm zel, tuma tluk phak lohin number 1 ni chungin kum tawp a hmang leh ngei ang; a hnuai chiahah Daniil Medvedev a awm.

Federer ang maia hliam vanga chawl lai Rafael Nadal pawh a hnung tawlh. Spanish tlangval hi panganaah a la awm a, ani pawh hi a chawl reng a nih chuan a dinhmun a him bik lo - season thar tirah a inkhel nghal thei dawn em, tih a la chiang lo a ni.