Ka hliam a dam tawh - Thiem

Dominic Thiem chuan a ke hliam a dam tawh thu a sawi a, mipa tennis season kharna ATP Finals khel turin London khawpuiah a zin luh theih tur thu a sawi chiang.

Vienna Open an khelh zawh takah khan Thiem a inlan a, beisei a phak lo. A nomawi kawl lai a hloh bakah hliam nei chungin a hun tawp a hmang, kar khat a liam hnuah erawh chuan inkhel turin a inpeih leh ta.

US Open champion Thiem chuan, "Kan chenna Vienna khaw-puiah ngei ka chak lo kha a ni a, mipui lamin min beisei san lai taka chak loh kha chu a hrehawm hle. Chak loh hliam phei kha chuan sawi tur a vang duh hle.

"Tunah chuan O2 Arena lama inkhel turin inbuatsaihna ka nei thei leh tawh a, nikum lama ṭha taka ka khelh tawh ang khan inelna nuam leh hlimawm a nih leh ngei pawh ka beisei," tiin a sawi.

Season hmasa ATP Finals-ah khan Thiem hian final a lut, Roger Federer leh Novak Djokovic te nen awm khan mah se knock out stage a lut thei. Semifinal-ah Alexander Zverev a hneh a, nomawi inchuhna inkhelah erawh Stefanos Tsitsipas a ngam lo thung.