Premier League-ah Substitution panga ngaihtuah nawn dawn?

Premier League-ah substi-tution panga hman chungchang hi ngaihtuah a ni tawh a, vawi hnih hnawl a ni tawh. Amaherawhchu tun hnaiah hliam an tam avangin Premier League manager te chuan substitution panga hi ngaituah nawn tur hi an dil maithei.

FIFA-in Covid-19 vangin player panga substitution hman a phal a, league thuneitute duh danah a innghat. La Liga, Serie A leh Bundesliga-ah te substitution panga hman a nih vek laiin Premier League-ah erawh season liam ta tawp lamah substitution panga hman a ni chungin tun season-ah substitution pathum chauh hman tur a ni.

Tun hnaiah Premier League-ah player inhliam an tam a, manager tam takin substitution pathum chauh an phal chu chhan pakhatah an ngai. Liverpool boss Jurgen Klopp leh Manchester City manager Pep Guardiola te chuan Premier League hi an sawisel tawh.

Premier League thuneituten substitution chungchang hi vawi hnih an chhawp nawn tawh a, a tlang lo ve ve. Substitution panga hmang tur hian club 20 aṭangin club 14 rem tihna a ngai a, an thlan hnuhnun zawkah hian substitution panga duh 11 an awm. 

West Ham boss David Moyes chuan a tirah substitution pathum duh mah se tunah chuan panga a duh tawh thu a sawi. Hetihlai hian Aston Villa manager Dean Smith chuan pathum ni zel se a duh thu a sawi mthung.

Villa boss Dean Smith chuan, "Kan squad a chhah tawk lo a, chuvangin thiam takin kan player neih kan hman a ngai. Europe-a khel pha club ṭhenkhat squad a chhah ṭha em em a, an rilru put hmang hi ka hriatthiampui. Ka ngaihdanah chuan substitution pathumin bul kan ṭan a, hetiang bawk hian a tawp kan khar tur a ni," tiin a sawi.

Manchester United manager Ole Gunnar Solskjaer pawhin fixtures chungchang chu na takin a sawisel tawh a, Covid-19 vanga buaina bakah player inhliam an awm ve reng avangin club lian manager-te tan chuan substitution panga hi a duhthusam a ni.

Blackburn striker hlui Chris Sutton chuan, "Manager ropui tak tak an ni a, naupang chhia ang maiin an khawsaah ka ngai. Sum tam tak an hmang a, an player neih ang te thiam takin an hmang mai tur a ni. Substitution panga hi an remti a nih chuan club lian dinhmun a ṭhat fal dawn avangin a dik thei lo," tiin a pawm ve lo thung.