Kovac-a'n nomawi nen Frankfurt a thlah

Bayern Munich coach thar tur Niko Kovac chuan Ein­tracht Frankfurt manager a nih chhunga a match hnuhnung ber atan German Cup final-ah a naute a kaihruai a, season thar aṭanga enkawl tur Bayern hi 3-1 a hnehin 1988 hnua a vawi khat nan nomawi an chawi a, season thara European football khel turin a mangṭha zui nghal bawk.

Olympiastadion Berlin-a inkhelah Eintracht Frankfurt tan striker Ante Rebic-a'n goal hnih a khung bakah midfielder Mihat Gacinovic chuan goal khat a thawh bawk a, Bayern tan striker Robert Lewandowski goal khungin nomawi a ngen chhuak zo lo.

Kovac-a thluak
Inkhel ṭan hmain Bayern Munich chu chak tura rinkai zawk an ni a, team nem zawk nia ngaih Eintracht Frankfurt tan season thara Europa League khelh theihna a nih avangin a pawimawh zual bik hle thung.

Croatia international Rebic chuan James Rodriguez tih­sual chhawrin minute 11-naah goal hmahruai a khung; goalkeeper Sven Ulreich tan dan theih a ni lo. Second half-ah Joshua Kimmich thawhrah sengin Poland in­ternational Lewandowski-a'n an siphurh a sut a, darkar chanve chuang hun a la awm avangin Jupp Heynckes naute hi rinkai zawk an la ni zui tho.

Amaherawhchu, hun tawp hma minute riat chauh a awm tawh tihin Fiorentina striker hlui Rebic bawkin an goal hnihna a khung a, Kovac-a'n midfield-ah a naute a remphui ṭha a, an khaipa Kevin-Prince Boateng a rintlak hle bawk.

Boateng hian Javi Martinez a tihtluk avangin penalty an chawi ngei dawn niin a lang. Mahse, VAR hman a nih hnuah referee Felix Zwayer chuan corner a pe zawk a, heta ṭanga ball chhuak hi Frankfurt lamin hmang ṭangkaiin Mihat Gacinovic chuan an goal thumna khung nan a hmang.

Thawnthu ngaihnawm
Kum 46 mi Kovac chuan, "Football chanchin mawi leh ngaihnawm tak a ni, kan ṭangrual a nih phawt chuan engpawh kan tawng thei a ni," tiin German Cup champion an nih hnuah a sawi, season hmasa khan final a khelhpui tawh bawk.

Eintracht hi 1959 khan German champion an ni tawh a, 1960 khan European Cup-ah pahnihna an ni tawh bawk. Bundesliga tia hming an pek hnuah hlawhtlinna an chang thei mai lo a, 1974 kuma DFB Cup an chawi bakah UEFA Cup 1980 champion an nih hnuah hlawhtlinna chang loin an awl rei vang vang hle.

Kum 1997 hnulamah phei chuan Bundesliga aṭangin vawi li ngawt an tlahniam a, Croatian manager Kovac-a'n March 2016 aṭanga team enkawl hna a thawh aṭang erawh chuan thawnthu a danglam. Kovac hian playoff-ah Nuremburg hnehin a inhamtanpui a, a season khatnaah hian German Cup final an lut bawk.

Tun season-ah player ṭha leh langsar kawl mumal lo mah se Bundesliga table chunglamah a awmpui deuh reng thei a, match 34 khelh aṭanga point 49 hmuin table-ah pariatna an ni - German Cup an chawi avang hian season tharah Europa League an khel dawn a, season hnih chhunga a hnathawh vang hian German club ṭha ber Bayern enkawltu nih a phu.

Mangṭha Heynckes
Jupp Heynckes-a'n a match hnuhnung ber atan Bayern Munich a enkawl ve tho a, German manager hian a hun hnuhnungah duhthusama ṭha result a nei thei lo. Treble champion ni tawh hian Bundesliga title chu a la tho a, Champions League-ah Real Madrid an ngam loh bakah an chawi theih tura ngaih German Cup an hloh bawk.

Bayern Munich-in hnehna chang lo mah se captain Manuel Neuer chu bench-ah a ṭhu thei tawh a, hliam vanga thla riat zet chawl tawh Germany international hi season tharah chuan a inlan thei ngei tawh a beisei awm - FIFA World Cup pawh a khelh theih beisei a ni.

An vanneih ṭum chu ni se Frankfurt lakah Thomas Muller leh Lewy ten goal tam zawk khung theihna hun an nei a, defender Mats Hummels pawhin hun tawp nan minute 10 chauh a awm tawh tihin si phur sut theihna hun nei mah se goal ban a tih per hlauh, Bayern player-te an vanduai ni a inrual!

Kum 73 mi Heynckes chuan, "A chang chuan thil mak leh na tak hi a dawnsawn dan kan thiam a ṭul ṭhin a ni. Ṭha taka hun khar duh mah ila an theihna zawng zawnga khel kan hmachhawn miau avangin thil a awlsam ta lo a ni," tiin a sawi.