FA Cup-ah Chelsea an champion ; Mourinho tlarhnung aiin Conte tlarhnung a phui
Chelsea manager Antonio Conte chuan FA Cup final Inrinni zana khelhah Manchester United manager Jose Mourinho chu game plan inang 'defensive game'-ah hnehin London club a champion pui.
Wembley Stadium-a inkhelah Eden Hazard chu danglamna thlentu a ni a, Belgian forward hian minute 22-naah a penalty hlawhchhuah chu goal-ah a chantir a, inkhela goal awmchhun niin 1-0 in hnehna an chang. Blues-in an khelh ṭhat loh season-ah nomawi an chawi ta tho a, Italian manager Conte erawhin London club a enkawl zel a rinawm tawh lo.
Hazard = Class
Team pahnihin fimkhur takin bul an ṭan a, Eden Hazard-a'n minute 22-naah Cesc Fabgregas aṭanga a ball hmuh chu engmah lo aṭangin goal khung ngeina tur chance-ah a siam a, tawih zeta ball la thlain United defender Phil Jones-a awmna dik lo chu a tih lansarh belh a. English defender hian a tihsual siam ṭhat tumna lamah Belgian forward hi a tlawh thlua a, penalty a chawi.
Tun hma dan leh hraiah chuan Jones pawh hi hnawhchhuah nghal tur a ni a, amaherawhchu 2016 khan dan hi her danglamin hremna pathum 'penalty, red card leh suspension' pek tawh loh tur a ni a. United defender hian ball chhuhsak a tum avangin penalty leh yellow card a chawi ta zawk a, Jones hian ball tum loin Hazard hi nam thlu se chuan penalty bakah red card a hmu ang a, suspend a ni zui ang.
Belgian forward Hazard hian chak pui tham player a ni tih pholang zuiin a penalty hmuh chu 'cool' takin David de Gea bum nan a hmang a, Wembley Stadium leh final boruak vangin a buai lo a, tun season Premier League golden glove dawngtu hmaah a zam chhete lo.
Mourinho vs Bus Park
Goal a luh hnuah inkhel kal hmang tur a hriatthiam nghal a, Mourinho chuan nomawi a chawi theih nana a game plan thul khung 'bus park' a hmachhawn ve a ngai ta thung. Chelsea-in Antonio Conte an nei a, Italian manager a nih bawk avangin tlarhnung rem phui a hnehsawh hle.
Mourinho-a'n inhliam dam hlim Romelu Lukaku bul a ṭantir ngam loh avangin an goal nawr a na thei lo a, Alexis Sanchez thiamna tak angin a la chhawr fuh thei lo a, Marcus Rashford a la patuai deuh bawk avangin inkhel an thunun chu goal-ah an chantir thei lo.
Chelsea keeper Thibaut Courtois-a'n dan ṭhat bik a nei lo a, Rashford-a goal khung tur erawh a tih ṭhat rualin English forward finishing a ṭha tawk lo. Danglamna beiseiin Lukaku leh Anthony Martial te bench aṭangin an lut a, awmze neia Blues tlarhnung inrem ṭhiah an harsat a. Paul Pogba-a'n corner aṭanga a ball hmuh chu vengtu nei lo mah se goal zawnah a tauh thei lo.
Manchester United-in ball possession 66% an nei a, goal attempt pawh vawi 18 zet an nei a, Chelsea neih let thum a tling. Alexis Sanchez-a goal khung chu offside vangin pawm a ni lo a, VAR aṭanga enlet erawh chuan referee thutlukna a dik thlap a, United vanneih zan a ni lo.
Statistics aṭangin United-in chak an phu a, chutihrualin United hian goal zawnah vawi nga chiah an pet a, Blues aiin vawi hnih chiahin an nei tam. Conte hoten goal an khung hma avangin goal venghim thei dinhmun an ding. Hei bakah hian counter attack hmanga an nawr let ṭumin box chhungah ball-in Ashley Young-a kut chiang takin a per a, referee Michael Oliver-a'n a hmu ngei a, VAR a rawn lo. Penalty vawi hnihna hi pe se awlsam zawkin an chak thei ang.
Ngaihnawm
Mourinho-a'n English club a enkawl ṭuma cup final-a a chak lohna hmasa ber a ni. Hemi hma hian League Cup final pali bakah FA Cup leh Europa League final-ah te hnehna a chang vek. Conte-a'n domestic cup final-a hnehna a chan vawi khatna a ni thung. Juventus a enkawl laiin 2012 Coppa Italia fianl-ah Napoli an hneh lo a, nikum khan FA Cup final-ah Arsenal an hneh lo.
Chelsea-in a vawi riat nan FA Cup nomawi an chawi a, kum 2012 hnua an chawi lehna hmasa ber niin Tottenham nen an nomawi chawi zat a inang a, Man Utd (12) leh Arsenal (13) te chiah an tluk lo.
FA Cup hnuhnung 10 zinga pasarih chu London club-in an chawi. (Chelsea pali leh Arsenal pathum).
Chak an phu lo – Mourinho
Manchester United manager Jose Mourinho chuan, "Ka lawmpui a, chak erawh an phu lo. Chelsea hi ka club hlui an nih vang ni ringawt loin Mancheser United manager ka nih avangin zahawm taka ka awm a ṭul a, chutirhualin ka ngaihdan chu chak kan phu tih hi a ni. Chelsea kha an a bik lo a, Lukaku leh Fellaini te an awm lo tih hriain mi pariat emaw pakua ten goal an veng a ni," tiin an vanduai thu a sawi. Portuguese manager chuan sawi chhunzawmin, "Chak loh hrim hrim a na a, chutihrualin kan theihna zawng zawng kan hlan avangin inchhirna tur a awm lo," tiin a player-te khelh danah a lungawi thu a sawi.
Club tan ka rinawm – Conte
Chelsea manager Antonio Conte chuan, "FA Cup-ah team ṭha tak Manchester United kan hneh a, kan lawm tur a ni. Tun season-ah pangana kan ni a, Champions League kan khel pha lo tur hi pawi ka ti a, kan dinhmun tak thlir thiam erawh a ṭul a. Nomawi nena season kan khar hi a lawmawm," tiin hnehna an chan avangin a lawm. Italian manager hian season hnih chhungin London club hi Premier League leh FA Cup-ah a champion pui a, manager tam tak tih theih loh titu ni mah se chhan dang tam tak avangin Blues a enkawl chhunzawm zel hi a rinawm loh zawk.
Conte chuan, "Ka contract neih hi ka zah a, club tan ka rinawm a, ka theihna zawng zawng ka hlan ang. Chutihrualin ka hna hi a awlsam lo a, club thutlukna ṭha emaw ṭha lo emaw a dawngsawng thiam a ṭul. Ka hma lam hunah eng pawh thleng se kan club leh min ṭantute hi ka ngaina chhunzawm zel ang," tiin a hma lam hun a chian loh thu a sawi.