Siami telna India pahnihna

Mizo tleirawl Lalremsiami telna India hmeichhe hockey team chu Asian Champions Trophy-ah pahnihna an ni. Nimin khan final khelh niin India hi a thlengtu South Korea lakah 1-0 in an tlawm, goal awmchhun hi Lee Youngsil khung a ni.

Inelna hi a tirah chuan pool match khelh kual hmasak a ni a, an inkhelh kual vek hnuah a sang pahnih ten final hi an khel. India hian an match hmasa paliah hneh loh an tawng lo. Match hmasa berah Japan chu 4-1 in an sawp a, chumi hnuah China (3-1) leh Malaysia (3-2) te an hneh leh.

Match pathuma an chak avangin India hi final an lut chiang a, Inrinni khan pool match hnuhnung ber atan South Korea an hmachhawn. Kolasib tleirawl Siami goal hmangin Korea nen hian 1-1 in an inhnehtawk a. Korea nen a sang pahnih an nih miau avangin nomawi an inchuh zui a, champion lai India-in an vuak goal theih loh tuarin pahnihnaah an lungawi a ṭul.