Nomawi nen Gianluigi Buffon a liam

Gianluigi Buffon chuan Inrinni zan khan Juventus tana a match hnuhnung ber a khel a, Italy legend hian Serie A nomawi chawi chungin Turin club a mangṭha. Massimiliano Allegri naute hian Verona 2-1 in an hneh a, a zawnin a vawi sarih nan Italian champion an ni.

Allianz Stadium-a inkhelah si ban nghaktu ropui Buffon chu minute 64-naah thlak a ni a, Daniele Rugani leh Miralem Pjanic te goal hmanga si hnih faia hma an hruai lai a ni. Gigi-a'n khelmual a chhuahsan dawn hian mipui lamin ding chungin zahna chibai an buk a, midfielder Claudio Marchisio hnenah captain armband hlan chhawngin – Juve jersey a hakpuite a kuah kual hnuah mittui nen a hun hnuhnung a hmang.

Juventus tana Serie A nomawi pakua leh Coppa Italia title pali latu Buffon hian inelna hrang hrangah match 656 a khelh aṭangin clean sheets vawi 300 a nei thei a, a match hnuhnung berah hian wing back Mohamed Fares ball pet vawi khat a dan sak bak hna hautak thawh tur a nei lo.

Kum 40 mi Buffon hian mipui lawm a hlawh a, khelmual chhunga a awm laiin ball a khawih fuh apiangin mipui thawm a ṭha thei hle. Parma aṭanga bul ṭantu ni mah se, hun harsa an tawh lai pawh Juventus tana rinawm taka season 17 teh meuh a khelh avangin Turin club tan chuan player ropui leh hlu bik a ni.

Season tawp rualin Buffon hian Juventus tana a khelh tawh loh tur thu hi a sawi chiang tawh a, football erawh a mangṭha nghal dawn tihna a ni kher lo. Juve hian player ni tawh lo mah se club chhunga hna thawk turin an sawi nia sawi a awm, Ligue 1 club hausa Paris St-Germain pawhin an goal veng turin tuna a hlawh let hnihin an sawm niin an sawi bawk.

Gigi mangṭha
Juventus manager Massimiliano Allegri chuan a keeper chhuak tur chungchang sawiin, "Club tana a thil lo tih tawh zawng zawngte avang khan Gigi Buffon hian hetiang taka ropuia thlah hi a phu a ni, a tan pawh hetiang baka hun tawp hman dan ṭha a awm thei chuang lo," tiin a sawi.

Italian manager hian Buffon hi khelmual chhung leh a pawnah hruaitu ṭha a nih thu a sawi fo tawh a, Juventus tana a khelh lai hian player naupang tam tak tan entawk tur a hnutchhiah hnem hle.

Argentina international Paulo Dybala chuan, "Match 100 kan khel dun, ni 1,040 chhungin hlimni leh lungngaihni kan tawng a, i hma hun zel turah hlim taka awm turih duhsakna ka hlan a che–captain, ka ngai dawn khawp mai che," tiin a sawi.

European club liante inelna sang ber Champions League nomawi a chawi loh avangin Buffon hi a famkim bik lo. Chutih rualin football inelna ngaihhlut ber FIFA World Cup 2006 khan an ram Italy a champion pui miau avangin, khawvel goalkeeper ropui an sawi apiang Gianluigi Buffon hming hi lam hmaih a ni tawh ngai lo ang.