F1 thu neitu an inhawng zau

Car intlansiakna sang ber Formula 1 thuneitu lam chu Covid-19 vanga buaina an hmachhawn vangin insiamrem a ngai a nih pawhin an inhawng zau hle, season kal laiah dan leh hrai siamṭhat a ngai a nih pawhin an pawiti lo.

F1 inelna hmasa Australia, Bahrain, Vietnam leh China Grand Prix te neih theih a ni rih lo a, thu thar berah chuan Monaco Grand Prix chu ṭhulh a nih bakah Dutch leh Spanish GP te chu a hun sawn lailawk a ni bawk - intlansiak pasarih ngawt a nghawng buai ta tihna a ni.

Ningani zan khan team tin aiawh, F1 chairman Chase Carey, managing director Ross Brawn, leh FIA hotupa Jean Todt te an inhmukhawm; hri leng vanga harsatna an tawh mek leh an la tawh zel theihte an hmachhawn dan tur an sawiho. Tun season-ah hian F1 dan thar hrang hrang hman tum a awm nual a, mahse team inlan tur 10 zinga pakua chuan hman rih loh an duh. Dan leh hrai an hman lai pawh kum 2022 hma chuan a ngai anga kaltlang pui rih a ni ang.

Sum hman tura ruahman dollar maktaduai 175 chu sawiho leh a ni dawn bawk a, nakinah inelna an nei thei a nih pawhin tlan chhinna leh intlanisak tak ni thum chhung an neih ṭhin chu ni hnih atan tih tlem a ni bawk. Motosports lama thu neitu sang Federation Internationale de l'Automobile (FIA) chuan, "Inelna hi mitin tan a him chin a nih hunah a rang thei ang bera neih a ni ang," an ti. May thla hma chuan an intlansiak rih dawn lo tih a chiang.

F1 chairman leh chief executive officer Chase Carey chuan, "Keini lam chuan team thutlukna kan pawmpui a, F1 leh FIA chuan tunah hian 2020 calendar chu ennawn turin a buatsaih mek a ni," tiin a sawi.