East Bengal coach thar Bastab Roy

Khalid Jamil an ban hnuah East Bengal chuan coach thar an neih thu an puang a, Indian Super League club ATK assistant coach hlui Bastab Roy an lalut.

Red and Golds hian season liam ta ṭan dawn khan beiseina sang tak nen Khalid Jamil an lalut a, mahse I League awm hnua Indian coach hlawh hnem ber hian an beisei ang result a hmuhpui lo.

Aizawl FC coach hlui Khalid hian result beisei ang a neih loh bakah technical director thar Subash Bhowmick nen an inhmu thiam lo a, Bastab Roy hi Bhowmick kaihhruaina hnuaia team enkawl tura beisei a ni.

Kum 2015 aṭanga ATK assistant coach lo ni tawh Roy chuan, "East Bengal enkawl hi chona phurawm tak a ni a, Bhowmick nena thawhdun hi ka chak tawh takzet a ni.

"ISL-ah coach langsar Antonio Habas, Teddy Sheringham leh Jose Molina te hnen aṭangin zirlai ropui tak ka zir a, chu chu discipline-a ni," a ti a, discipline a ngaihpawimawh tur thu a sawi.

Subash Bhowmick chuan East Bengal enkawl tura Indian coach pasarihin dilna an thehluh thu a sawi a, Bastab Roy chuan a tirah a sawmna hnar mah se a vawi hnih sawmnaah an hlawhtlin thu a sawi bawk.