Cavaliers-in Celtics an hneh let

Nimin zing khan Cleveland Cavaliers-in Quicken Loans Arena-ah Boston Celtics an mikhual a, LeBron James-a hoin Cavs-in 116-86 in hnehna an chang. Eastern Conference finals-ah Celtics-in 2-1 in hma la hruai tho mah se game 3-ah Cavaliers-in hnehna an chan chian avangin chak tur erawh a chiang ta lo.

Thawhlehni zing dar 6:00 hian a hmun ngaiah game 4 khelh a ni dawn a, a hmuhnawm ang. Western Conference finals game 3 chu tukin dar 5:30 hian khelh a ni dawn a, Golden State Warriors leh Houston Rockets te 1-1 in an inhnehtawk mek. Champion lai GSW-in an 'home' Oracle Arena-ah a dinhmun siam ṭhat an tum dawn.

Harhtharna
Game 2-ah LeBron James-a'n point 42 zet a nei a, triple double nei tel bawkin Cavaliers in hnehna an chang zo lo. Cavs coach Tyronn Lue chuan guard pahnih J.R. Smith leh George Hill te chu basket neih kawngah ṭan la turin a fuih a, game 3-ah a danglamna a lang.

Game 2-ah guard pahnih ten court chhungah a belkhawmin darkar khat hun an hmang chungin point hmuh belhkhawm chu point thum chauh a ni. Game 3-ah erawh Hill-a'n point 13 a nei a, JR Smith-a'n point 11 nei bawkin team angin an khel ṭha tih a lang.

Cleveland hian quarter khatna aṭangin inkhel an thunun nghal a, 32-17 in hma an hruai nghal a, quarter tinah hnehna an chang bawk. Ṭum dang ang bawkin LeBron James a che ṭha a, point 27 leh assists vawi 12 neiin double double a nei a; Kevin Love (13 pts) leh Tristan Thompson (10) ten point 10 hmu tling bawkin Cavs bul ṭantu mi panga ten double digit an nei pha vek.

Bul ṭan lo mah se Cavs tan Kyle Korver a che ṭha bawk a, point 14 a neih phak bawk avangin mikhual Celtics lakah an chungnung hle. Cleveland coach Tyronn Lue chuan, "Celtics chu an 'home'-ah an che ṭha sa a, chuvangin 2-0 a hma an hruai avang khan kan hnual phah lo," tiin chakna kawng a inhawn thu a sawi a, game 3-a hnehna an chan takah chuan beiseina an nei sang lehzual ang.

Celtics an buai
Celtics tana point hmu tam ber Jayson Tatum-a'n point 18 a nei a, Terry Rozier-a'n point 13 chiah a belh thei a, Jaylen Brown erawh foul ngah vanga a buai avangin game hmasa pahnihah chawhrualin 23 nei pha mah se point 10 chauh a nei pha.

Celtics head coach Brad Stevens chuan, "Kawng engkim­ah min ṭhat hneh a, kan tluk lo a ni," tiin an hneh loh tih a pha lo. Celtics big man Al Horford pawhin, "Kan khelh tur dan angin kan khel lo a, team angin kan khel lo. Chutihrualin hetiang hi thleng thei a ni," tiin a sawi.

Celtics guard Rozier chuan, "Kan insiamṭhat ran a ṭul a, game 4 atan kan inpeih vat a ṭul a ni," tiin Quicken Loans Arena-ah hnehna chan ngei an tum thu a sawi.