Serie A-ah Parma an kir

Parma chuan season thum a zawna promotion an hmuh hnuah Serie A an khel leh dawn ta. Italian club langsar ni ṭhin hi 2015 khan sum lamah an tlak chhiat avangin Serie D-ah relegate tir an ni.

Serie D-ah season khat chiah hun an hman hnuin Lega Pro-ah kaisantir an ni a, tun season ṭan dawn khan Serie B-ah an kaisang leh. Zirtawpni zan khan Spezia chu 2-0 in an hneh a, an khingpui Frosinone-in Foggia 2-2 a an inhnehtawkpui avangin Serie A an kai chiang.

Serie A aṭanga Serie D lama relegate an nih hnu thleng pawha Parma chhuahsan duh loa khelh chhunzawm Alessandro Lucarelli chuan, "A tak tak a ni thei lo, thil theih a ni lo, ka awih thei lo," tiin season thum chhunga Serie A an kai leh thei chu mak a tih thu a sawi.

Kum 40 mi defender chuan sawizawmin, "Kum thum chhungin thil ropui tak kan ti a, hetiang hun kan tawn hi tumahin an ring phak lo ang. Hei chu duh­thusam ai pawha ropui zawk a ni. Kan chunga rinna nghat tlat ṭhin kan fan-te tan hei hi lawmman a ni a, an captain ka ni thei hi ka inchhuang a, tunah chuan hahdam takin ka chawl thei tawh hial ang," a ti.

Parma captain hian July-ah khian kum 41 a tling tawh dawn a, Parma-ah hian coaching staff anga a cham chhunzawm beisei a ni.