Djokovic tan Nadal a hriam hret

World number 1 hlui Novak Djokovic-a'n tun hnaiah khel ṭha viau mah se a hma a ding Rafael Nadal lakah erawh a la ṭha tawk lo. Inrinni zan Italian Open semifinal inkhelah Serbian tlangval Djokovic hi Nadal lakah 7-6 (7/4), 6-3 in a tlawm.

Italian Open semifinal inkhel lehlamah Alexan­der Zverev chuan US Open champion hlui Ma­rin Cilic chu 7-6 (15/13), 7-5 in a hneh ve bawk a, German rawl­thar duhawm hian tun hnai ATP Masters 1,000 khelh hnuhnung 10 zinga pangaah final a lut thei; seeded pakhatna Nadal nen nizan khan nomawi an inchuh zui a, he thu buatsaih lai hian result kan hre hman lo.

Vawi sarih a champion tawhna hmunah Nadal-a'n a theihna sanzia a lantir zel a, set khatna la turin darkar khat leh minute 13 zet hmang mah se, set hnihnaah erawh game thum chiah a hloh - a khingpui service hi game thumnaah chhuhsakin, harsa lutuk loin set a la zui thei.

Nadal hi Grand Slam vawi 12 champion tawh Djokovic nen vawi 51 an intawn tawhah a vawi 26 nan hnehna a chang hram - match khatin hnehna a chang hnem zawk. Chutihrualin Spanish star hian May 2017 hnuah a vawi khat nan Djokovic hi a hneh ve leh chiah a ni. Tun anga an khel chho zel a nih chuan French Open-ah pawh nomawi inchuh thei tur an ni ang.