Kolkata Knight Riders dinhmun a chiang

21st May, 2018

Indian Premier League a ngaihnawm zel–Kolkata Knight Riders chuan Inrinni zan khan playoff-a an hmun an tichiang ve leh ta a, Sunrisers Hyderabad chu wicket ngain an hneh.

Hyderabad club hi bat hmasa zawkin over 20-ah run 172 an siam a, wicket kua an hloh–Shikhar Dhawan (50 runs) chu SRH tana run siam hnem ber a ni a, KKR bowler Prasidh Krishna chuan wicket li a la.

Kolkata club-in hnehna an chan chuan playoff an khel dawn tih an hria a, Chris Lynn (55) leh Robin Uthappa (45) ten ṭha taka an rawn bat avangin over 19.4-ah target an umpha a, wicket nga an hloh.

RR beiseina
Inrinni zan inkhel dangah Rajasthan Royals chuan beiseina an chhi nung thar ve leh bawk a, run 30-a Royal Challengers Bangalore hnehin RCB beiseina a tawp thung.

Jaipur club hian over 20-ah run 164 siamin wicket nga an hloh a, Rahul Tripathi chuan run 80 siama a tawp thleng damin Rajasthan tan 'hero' a ni.

Bangalore club-in beiseina sang tak nei mah se over 19.2-ah run 134 chiah tlinin an out vek a, run 53 siamtu AB de Villiers-a'n puitu a nei lo–Rajasthan tan Shreyas Gopal chuan wicket li a la a, RCB batsman ten an ngam lo.

A thlawn mai maw
IPL playoff khel thei lo chiang tawh Delhi Daredevils chuan Zirtawpni zan khan run 34-in Chennai Super Kings an hneh a, he inkhel result hian table a sawi danglam lo.

Delhi club hian over 20-ah run 162 siamin wicket nga an hloh a, player che ṭha fal sawi tur an awm lo. CSK bat hun a thleng a, an target thlirin hnehna an chan ngei a beiseiawm.

Mahse, Ambati Rayudu (50) tih loh batsman dang zingah che ṭha an awm lo a, over 20-ah run 128 chiah siama wicket ruk hlohin an tlawm.

A tawpna
IPL league round chu nizan khan khelh zawh a ni a, Delhi Daredevils vs Mumbai Indians leh Chennai Super Kings vs Kings XI Punjab an inkhel a, he thu buatsaih lai hian result kan hre hman lo.

Sunrisers Hyderabad, Chennai Super Kings leh Kolkata Knight Riders chu playoff khel tura tling chiang vek tawh an ni a, nizan inkhel result a zirin Rajasthan, Mumbai Indians leh Kings XI Punjab zinga pakhat hian an zawm ve leh ang.