July laihawlah Ligue 1 zawh beisei

French Football Federation Noel Le Graet chuan coronavirus vanga an buaina chu kuminah a fel hman a ring a, an rama league sang ber Ligue 1 pawh July thla laihawl velah chuan khelh zawh theih a beisei thu a sawi.

Noel Le Graet chuan, "June thla tawpah hian zo thei ila chu duhthusam a ni. Mahse, Champions League leh Europa League a la awm a, club ṭhenkhat tak inhnaihchilh taka match khelh reng thei a ni dawn lo.

"Hun rei deuh zawk khelh a ngai a nih pawhin keini lam chuan kan pawiti lo, July 15 thleng kan khel a nih pawhin kan ṭhat tlanna tur zawk a nih chuan kan pawm vek. Italy, Spain leh France te hi chuan April thla hma chuan training pawh kan chhunzawm thei rih dawn lo tih a hriat," a ti.

Champions League leh Europa League te pawh an chawl lailawk mek a, UEFA chuan Euro 2020 pawh nakkum nipui laia neih turin a sawn lailawk tawh. Europe ram hrang hrangte chuan anmahni rama league ṭheuh kalpui dan tur an ngaihtuah mek.