Mangṭha mai le Andres

"Ka thinlunga hmun pawimawh chang reng chungin ka kalsan dawn che u a ni," tiin Andres Iniesta chuan a hmangaih Barcelona a thlah a, khawvelin footballer a hmuh tawh zinga hmuhnawm ber pawl mita mittui tlingkhawm chu hmuh hmaih theih a ni lo.

Pathianni zan khan Barcelona chuan an mikhual Real Sociedad chu Philippe Coutinho goal khung hmangin 1-0 in an hneh a, club legend Iniesta-a'n Barcelona jersey ha chunga match a khelh hnuhnung ber a ni nghal bawk.

Barcelona hi Pathianni zan inkhelh hma hian La Liga-ah an champion chiang tawh a, inkhelh zawhah nomawi nen Iniesta hi thlah a ni - Nou Camp-ah kum 16 hun a hman chhungin nomawi liantham 22 a chawi hman.

Mangṭha Barca
Minute 82-naah Iniesta lakchhuah a ni a, an ṭhuthmun aṭangin fans zawng zawng an ding chhuak a, player-ten kut bengin an 'entawn' leh 'zah rawn' player an thlah a, Spanish midfielder hian Lionel Messi pan ding chungin a captain armband chu a hlan chhawng thung.

Spanish midfielder chuan, "Ka tan chuan vawiin hi ni duhawm lo tak a ni a, mah se he hmunah hian kum 22 ngawt hun duhawm leh hriatreng tlak ka hmang a ni. He club ropui tak, ka tana khawvela club ṭha ber ropuina humhim leh vengtu ka ni thei kha ka inchhuang a, ka hlim takzet a ni.

"Ka khelhpuite zawng zawng chungah lawmthu ka sawi a, ka ngai em em dawn vek che u a ni. Fan-te hnenah pawh lawmthu ka sawi a, mipa naupang nichunga he hmun ka lo pan tirh aṭang khan ka tan in hlu em em a, tunah chuan mipa tak tak nichungin ka chhuak dawn ta," tiin a hmangaih Barca a thlah fel.

Kumtluang atan Iniesta
Barcelona khelmuala inkhelah fan-ten stadium chu 'Infinite Iniesta' (Kumtluang atan Iniesta) tiin an cheimawi a, an club legend liam mai tur hi an ui a ni. Mahse, kum 34 mi a ni tawh miau a, Barca tana khel reng turin a theihnain a tlin tawh si lo.

Kum 12 mi lek nichungin Iniesta hian Barcelona youth academy hmingthang La Masia a zawm a, academy a awm aṭanga chhut hian Nou Camp-ah kum 22 hun a hmang. Barcelona tan inelna hrang hrangah match 674 a khel hman a, central midfield-a a kawppui ṭhin Xavi chu Barca tana inlan tam lama a phak loh awmchhun a ni.

Barcelona tan La Liga nomawi vawi kua ngawt a chawi hman a, Champions League-ah vawi li a champion pui bawk - Club World Cup (3) leh Copa del Rey (6) nomawi a chawi pawh chhuan tham a ni.

Mimal chawimawina
Iniesta chungchang sawi a nih apianga a ropuina tifamkim lotu nia an sawi ṭhin chu Ballon d'Or chawimawina a dawng lo hi a ni - mah se Spain coach hlui Vicente del Bosque khan thiam takin, "Ballon d’Or meuh pawh hian Iniesta nena dressing room pakhat inṭawm hi a phu lo a ni," tiin a lo sawifiah tawh.

Spain tana vawi 124 inlan tawh midfielder hi FIFA FIFPro World XI-ah erawh vawi kua ngawt a lang thei a, UEFA Team of the Year-ah vawi ruk a lang thei bawk. Spain tana World Cup leh Euro (2) nomawi pawh lo chawi tawh midfielder chawimawina dawn zawng zawng ziak dawn ila hun leh hmunin min daih lo ang.

Barcelona coach Ernesto Valverde chuan, "Ani ang player hi chu hun lo kal zel turah a chanchin sawi a ni reng ang a, amah ang neih leh hi thil theih a ni lo. Hirat reng tawh tur player a ni," tiin club legend hi a thlah.