Spain-in Chelsea quartet mamawh lo
FIFA World Cup 2018 khel tur Spain squad puan a ni a, player 23 koh zingah Chelsea player pali Cesc Fabregas, Alvaro Morata, Marcos Alonso leh Pedro te an tel lo a, FA Cup-ah champion mah se Premier League-a Blues chet chhiat an tuar niin a lang.
Morata hian Stamford Bridge-a a season hmasa berah match 48 khelin goal 15 a khung a, Spain coach Julen Lopetegui hmin nan a tawk zo lo. Ram tana Morata inlan hnuhnung ber chu November 2017-a Costa Rica 5-0 a an hneh kha a ni a, goal khat a khung. Kum 25 mi striker chuan, "Duhsakna tinreng ka hlan che u a ni," tiin Spain team hi a thlah.
Chelsea wing back Marcos Alonso-a'n mimal takin season duhawm a hmang a, defender nichungin match 46-ah goal riat a khung thei - hetichung hian a tan hmun a awm lo a, Blues tan tun season-a match 49 khela goal thum khungtu Cesc Fàbregas tan phei chuan beisei neih san chi a ni lo. Pedro hian tun season-ah match 48 khelin goal sarih a khung.
Arsenal defender Hector Bellerin chu koh loh zingah a tel bawk a, Premier League player zingah David De Gea, David Silva, Cesar Azpilicueta leh Nacho Monreal te chu koh vek an ni. Chelsea pantu Morata koh a nih loh laiin Blues hnuchhawntu Diego Costa erawh squad-ah hian koh a ni thung.
Spain coach Lopetegui chuan, "Team tana ṭha ber tura kan ngaih player leh nomawi min chawipui thei tura kan ngaih kan ko a ni," tiin an player thlan dan a sawifiah.