Marquez a fal tual tual

MotoGP champion lai Marc Marquez chuan season kal laiah pawh rider ṭha ber a nih zia a lantir chhunzawm zel. Honda bike khalhtu hian Pathianni zana tlan zawh tak French Grand Prix-ah hnehna a chang leh a, Le Mans-a pakhatna a nih vang hian rider championship lamah pawh point 36 zetin hma a hruai fal ta.

MotoGP vawi li champion tawh Marquez-a'n lap hmasa ber a tlan ṭha tawk lo a, paruknaah a tawlh hnung hman–Ducati rider Jorge Lorenzo chuan parukna aṭangin hma a rawn hruai zuai hman a.

Mahse, lap hnihna an tlan zawh chuan Marquez hi palina a ni leh tawh a, zawi muanga hma sawn chho zelin bike intlansiakna sang bera a vawi 38 chakna ni turin harsatna lian tham a tawk zui tawh lo. Tun season-a tlan ṭha tak Johann Zarco bakah Andrea Dovizioso ten intlansiak an tlan tluan thei lo a, a elpui Zarco a chetsual avangin Marquez hian hma a hruai fal theih phah.

Kum 25 mi Marquez chuan, "Rider tin mai kha kan inhnaih em em hlawm a, intlansiak harsa taka hnehna ka chang thei hi a pawimawh hle a ni," tiin a sawi. Tun season chhungin MotoGP intlansiak vawi 19 a awm dawn a, June 3 hian Italian Grand Prix an tlan leh ang.