Zverev aia huai zawk Nadal

French Open a hnai a, inbuatsaihna langsar ber pakhat Italian Open chu Pathianni zan khan khelh zawh a ni. Rafael Nadal chuan darkar hnih leh minute kua an inkhelh hnuah Alexander Zverev chu 6-1, 1-6, 6-3 in an hneh hram - Spanish star hian Italy khawpui Rome-ah a vawi riat nan Italian Open nomawi a chawi.

Italian Open champion hnem ber Nadal hian Roger Federer lehpelin world number 1 nihna a chelh zui nghal a, May 27 aṭanga main draw khelh ṭan tur French Open-ah seeded pakhatna a ni zui dawn a, tun ṭum final-a a hneh tak Zverev pawh seeded pahnihna a ni chhunzawm ang.

Malsawm ruah
Season hmasa khan Alexander Zverev hian Novak Djokovic hnehin Italian Open nomawi a chawi a, tennis player ṭha zual ho el phak a nih zia a lantir. German tlangval Zverev-a'n tun ṭumah pawh bul a ṭan fuh a, service hmasa zawk lo mah se Nadal a chhuhsak nghal.

Amaherawhchu, kum 31 mi Nadal-a'n a khingpui service chhuhsak let nghalin minute 32 chhungin set khatna a la a. Set khatna hloh mah se tun hnaia khel ṭha tak Zverev a buai phah lo, set hnihnaah game khat chiah hloh chungin a dingchang zawkah a ṭang let thei a ni.

Deciding set khelh zui a ni a, tun hnaiah a zawna match 14 hnehna chang thei Zverev bawk a che fuh hmasa leh. A service na tak chu Nadal-a'n a dawngsawng hleithei lo a, nuamsa takin 3-1 in hma a hruai! Mahse, a khelh ṭhat vanglai takin ruah sur vangin minute 11 chawlh an neih a ngai tlat.

An rawn kir hnuah Nadal-a'n a service lain 3-2 chiah a ni a, a hma aia nasain ruah a sur avangin a vawi hnih nan chawlh an nei leh. Ruah sur a ban hnuah tawnhriat ngah zawk Nadal a chesual duh tawh lo, game li la zawnin tennis a khelh hun chhunga a nomawi 78-na a chawi theih phah.

Ruah sur vanga an chawlh hma chuan kum 21 mi Zverev kha hmahruaitu leh dinhmun ṭha zawka ding lai a ni a, an khelh dan en pawhin champion ngei tura ngaih a ni. Mahse, ruah a sur hnuah a talbuai zui a, atan chuan anchhia a ni. Chutih rualin Nadal tan erawh a hnufual zawk a nihna aṭanga a thawh leh theihna a nih miau a vangin 'malsawm ruah' a ni thung.

A ṭha pahnih
Nadal leh Zverev te hi kum 10 zetin an inthlau a, world number 1 Nadal hi a vanglai liam chho mek a ni - clay court bikah erawh player ṭha ber a la ni. Kum naupang zawk Zverev hi player ropui inherliam mekte thlak thei tura ngaih a ni.

German rawlthar duhawm hian tun hnai ATP Masters final vawi 10 zinga a zatveah final a lut phak a, Italian Open-ah pawh game thum lak belh thei ni se Nadal hnehin a vawi hnih nana champion thei dinhmunah a ding hman.

Tun season chhungin Zverev-a'n match 30 hnehna a chang tawh a, tun hnaiah Munich Open leh Madrid Open nomawi a chai thei; a elpui Nadal ang bawkin tharum a ngah a, clay chu a inkhelh thiamna hmun niin a service a ṭha tawk bawk - inelna liana hlawhtling tura a mamawh chu huaisenna leh tawnhriat neih belh a ni.

Clay court inelna lian French Open-ah pawh vawi 10 champion tawh Nadal leh Zverev te hi champion tura rinkai an ni dawn. World ranking-ah a sang pahnih an nih avangin Roland Garros-ah chuan final hmain a n intawng thei lo ang.

Nadal chuan, "Tennis chu tennis a ni reng ang. Player ṭha ber hriat nan chuan best of five khelh hi a ṭha, chutih rualin Zverev hi khawvela a ṭha berte zinga mi a ni," tiin German rawlthar lakah beiseina a neih san thu a sawi chhuak.

Chak zo lo Zverev chuan, "A thleng miau si, a nihna takah chuan chawlhlawk kan hmang khan ka kaltluang lai a ti buai a ni. Kei aiin attacking a nei na zawk a, hun pawimawh vanglai taka a chefuh bik tlat kha a mak hle," tiin a sawi.