Goal hnih nen El Nino a liam

Wanda Metropolitano chhungah 'De Nino A Leyenda' tih chu lian takin fan-ten an siam a, 'Naupang aṭangin legend,' tihna a ni a, Fernando Torres thlah nana Atletico Madrid fan-ten an siam a ni.

"Naupang ka nih lai chuan kan class-ah 24 kan awm a, 23 chuan Real Madrid an ṭan. Kei maw? Kei chuan Atletico chiah ka ṭan," titu Torres chuan Pathianni zan khan Atletico Madrid tana a match hnuhnung ber a khel a, an mikhual Eibar laka goal hnih khung chungin a hmangaih jersey chu a hlip ta.

Eibar nena 2-2 a an inhnehtawkna inkhelah hian Fernando hi captain armband hren tir a ni a, coach Diego Simeone chuan, "Sulhnu ropui tak a hnutchhiah a, a hnathawh ang thawh ve hi a harsa dawn a ni," tiin kum 19 mi lek a nih laia Atletico captain lo ni tawh chu a thlah.

Kum 34 mi Torres hian 2007 khan Liverpool panin Atletico a chhuahsan a, Chelsea leh AC Milan tana a khelh leh hnuah 2015 khan a hmangaih club-ah hian a kir leh a ni.

Atletico tan match 404 khelin goal 129 a khung sak a, tun season bikah match 45 khelin goal 10 a khung sak a, Europa League-a an champion kha he club tana nomawi liantham a chawi awmchhun a ni - Liverpool tana a khelh lai kha a vanglai bera ngaih a ni.

Spanish striker hian season thara a khelhna tur a la ti chiang lo a, Liverpool-a laluttu Rafael Benitez chuan Newcastle United-ah lakluh a hnial loh thu a sawi tawh a, Reds tana a khelhpui ṭhin Steven Gerrard chuan Rangers-ah lakluh a tum dawn niin sawi a awm bawk.