Curry a la Chuai lo

Nimin zing khan Golden State Warriors-in Western Conference finals game 3-ah Houston Rockets 126-85 in an sawp a, NBA champion lai hian series 2-1 in hma an hruai chiah. Nilai zing hian Oracle Arena-ah game 4 an khel leh dawn a, GSW home record thlir chuan Houston Rockets hmabak a harsa dawn.

Golden State hian playoff-ah match 16 chhung chu an home Oracle Arena-ah hnehna an chak zawn tawh a, an chak loh hnuhnun ber chu 2016 Finals Game 7-a Cleveland Cavaliers an hneh loh kha a ni a, Michael Jordan-a hoa Chicago Bulls-in April 27, 1990 - May 21, 1991 chhunga playoff match 15 chhung an chak zawn record chu an khum chiah a ni.

Tukin zing dar 6:00 hian Cleveland Cavaliers leh Boston Celtics ten game 4 an khel dawn a, Eastern Conference finals-ah hian Celtics-in 2-1 in hma an hruai mek.

Curry Show
NBA Most Valuable Player award vawi hnih dawng tawh Stephen Curry-a'n tlakhniam lam a pan a, tun hma angin a dawng tawh lo a, defense lamah amah aṭangin a tlang a tam. Hetichung hian Warriors-in hnehna an chang ngun tho a, Curry vang ni tawh loin Curry awi nung chungin a tih theih.

Amaherawhchu, Conference finals game 3-ah pawh quarter thumna thlir zawh chuan hnial buai theih loin 'Curry a la chuai lo' tih chu thutlukna a ni. He quarter-ah hian Steph Curry chuan vawi sarihah vawi sarih a lut a, chung zinga vawi hnih chu 'long three' a ni a, reverse layup hmanga a luh leh Houston Rockets star James Harden hmaa a thiam thil a lantir zawha 3-points a lut chuan a thiamna leh pressure hnuaiah a buai lo tih a lang a, a lawm nana a dar an tisawi vel chuan Oracle Arena-ah hlimna a thlen leh ta.

Curry hian point 35 neiin game 3 bikah point a ngah ber a, GSW coach Steve Kerr chuan, "Steph hian hetiang hi a lantir fo tawh a, mi pakhat a ni," tiin a fak. Golden State chak danah Curry langsar mah se team hnathawh tih hmuh hmaih theih a ni lo a, Kevin Durrant chuan point 25 a nei ve bawk a, Draymond Green chuan point 10 bakah rebound vawi 17 neiin double-double a nei a, Klay Thompson (13 points), Quinn Cook (11) leh Andre Iguodala (10) ten double digit an nei pha bawk.

Beisei pha lo Rockets
Regular season-a team ṭha ber Houston Rockets-in nasa takin game 2 an phak lo a, tun season-a an kheh chhiat ber ṭumah a ngaih theih. Point 41 zeta GSW an phak loh avangin kum 1986 hnua playoff-a Rockets chak loh chian ber ṭum a ni.

Rockets hian turnover vawi 19 zet an nei a, February 26 hnua turnover an ngah ber ṭum a ni a. James Harden-a'n point 20 neiin assist vawi kua nei mah se Houston an mualpho ta tho.

Coach Mike D’Antoni chuan, "Team ṭha tak hmaah kan nem lutuk deuh a ni. Kan tihsual ho te te belhkhawm nghawng a lian a, kan tih tur kan tih loh avangin inkhelh ṭantirh lamah kan chak dawn lo tih a lang nghal," tiin a sawi a, Houton boss hian an naute a khelhtir danah a la tlawm lo tih lang.

Game 4 thlir chungin D’Antoni-a'n a player neih ṭhat hahdamna hun a pe tam a, Nilai zingah chak an tum avangin nimin zinga mualpho an pawisa lo a, GSW rinkai ni chhunzawm mah se chak chiang tiha sawi theih an ni lo.