Svitolina-i'n nomawi a humhim

Italian Open hmeichhe champion lai Elina Svi­tolina chuan world number 1 Simona Halep hnehin a nomawi kawl lai a hum­him. Pathianni zana final khelhah Svitolina hian 6-0, 6-4 in hnehna a chang.

Rome-ah nikum khan player pahnihte hian nomawi an lo inchuh tawh bawk a, kuminah seeded pakhatna Halep hi rinkai zawk a ni. Mahse, seeded palina hian tun inelna bikah match nga a khelh aṭangin set khat chiah a hloh a, champion phu ber tia sawi ngam a ni.

Kum 23 mi Svitolina hian game khat mah hloh loin set khatna chu minute 19 chhungin a la a, kum 26 mi Halep hi 5-0 in a hnufual laiin coach Darren Cahill chuan khelh dan tur thar a hrilh a ngai hial.

Romanian nula Halep-i'n set hnihnaah hmasawn ve deuh mah se, khel ṭha tluang laklawh Svitolina chu dan theih a ni lo - Ukrainian star hian tennis a khelh hun chhunga a vawi 12 nan WTA title a la ta a ni.

Italian Open champion Svitolina chuan, "A vawi hnih nana hetiang ka ti thei mai hi a mak zawk hle. Ka tan chuan hun duhawm leh hlu bik tak a ni," a ti a, kar leh maia khelh tur French Open atana inbuatsaihna ṭha tak a nih thu a sawi bawk.

Chak lo zawk Halep hian semifinal-ah Grand Slam vawi nga champion tawh Maria Sharapova a hneh thei a, final-ah erawh a service vawi li ngawt chhuhsak a ni thung. Halep chuan, "Elina khan a khel ṭha takzet a ni. Rome-ah hian a zawnin pahnihna ka ni ta a, ka dam a nih phawt chuan season lehah pawh ka inlan leh ang," tiin a la beidawn loh thu a sawi.