Portuguese Cup-ah beih tawk Sporting chak lo

Sporting Lisbon chuan anmahni ṭantu fan-te lak aṭanga beih an tawh aṭanga ni nganaah Portuguese Cup khelin Aves lakah 1-2 in an chak lo.

Pathianni khan Estádio Nacional-ah final hi khelh a ni a, team nem zawka ngaih Aves tan Alexandre Guedes-a'n minute 16-na leh minute 72-naah khungin Sporting tan Fredy Montero chuan minute 85-naah chhanglet mah se result a danglam pha lo.

Kum 1930-a din Alves hian an club history-ah kum thum chauh Portuguese league sang berah an la awm a, tun hi an final thlen vawi khatna a nih bakah league lamah an him chiah chiah bawk.

Amaherawhchu rinkai zawk Sporting hian final khel tura an inpuahchah laiin anmahni ṭantu ngeite hnen aṭangin beih an tawk. Kar liam ta Thawhlehni khan mi 50 hmai tuam chuan training-na hmun hi an tlawh a, player leh coaching staff chu kawng hren leh tiang hmanga an vuak bakah an hnek bawk.

Tun season-a goal 34 khungtu Dutch forward Bas Dost pawh telin feet ruk leh inches lia sang forward hi a lu leh a ke a hliam chu hmuh theih a ni a. Sporting chuan, "Hei hi kan club zia a ni lo a, hetiang tur hi a ni lo. Hetianga demawm taka chetute hi hrem lohin kan chhuah lo ang," tiin thuchhuah an siam a. Club thuneitu lam hian Cup final khel loa inhnuhdawh duh mah se player lamin final khelh an thlang a, nomawi erawh an chawi thei ta lo.

Khawvela player ropui ber zinga mi Cristiano Ronaldo larchhuahna Sporting hian kum 2002 hnuah league nomawi an chawi leh lo a, kuminah match hnuhnung berah Maritimo hneh loin Champions League qualifying round khel turin an tling pha lo bawk.