French Open khel lo tur Raonic

Clay court inelna lian ber French Open khelh turah world number 22 Milos Raonic chu hliam vangin a inlan thei dawn lo. Kum 27 mi Raonic hi tun hnaiah a khup hliam vangin a buai fo a, thla hmasa pawh khan Monte Carlo Masters aṭangin a lo inhnukdawk tawh bawk a ni.

Canadian tlangval Raonic hian 2016 khan Wimbledon final a khel a, khatih hun laia khel ṭha tak Andy Murray a ngam lo thung. French Open bika a thlen san ber chu 2014 kha niin quarterfinal-ah a tla.

Raonic chuan, "Ro­land Garros aṭanga inhnuh­dawh a ngai hi a na hle. Mahse, ka dinhmun thlirin hun rei zawk chawlh ka la mamawh a ni. Season tawp lamah chuan dam ṭha takin ka khelh theih leh tawh ka beisei," tiin a sawi.

Season khat chhunga Grand Slam pahnihna French Open hi tunkar chhung qualifier khelh a ni anga, May 27 aṭangin inelna tak (main draw) khelh zui a ni ang - champion lai chu world number 1 Rafel Nadal a ni.