Champion lai Mumbai Indians an tla

Indian Premier League champion lai Mumbai Indians chu Pathianni zan khan Delhi Daredevils lakah run 11-in an tlawm a, playoff khel turin an in vaw kai zo ta lo.

Mumbai Indians tlawm zanah Kings XI Punjab-in hnehna an chang thei bik lo a, hei vang hian Rajasthan Royals chuan playoff an khel dawn chiang ta bawk.

Rajasthan Royals hian an match hmasa pasarihah vawi li ngawt tlawm hmel hmu mah se league match hnuhnung lamah harhna an chang a, a hunah tak Mumbai leh Punjab an chesual ve leh bawk nen playoff an khel dawn ta a ni.

Mangṭha Mumbai
Delhi khawpuia inkhelah mual­neitu team an bat hmasa zawk a, over 20-ah run 174 siamin wicket li an hloh - run siam hnem ber Rishabh Pant chuan run 64 a vaw chhuak a, run 43 vaw chhuaka a tawp thleng dam Vijay Shankar-a'n a pui ṭha takzet bawk.

IPL-a champion ngun ber nichunga vawi thum champion tawh Mumbai Indians-in chak an mamawh tih inhre mah se Evin Lewis (48 runs) tih loh batsman dang zingah che hleithei an awm lo a, over 19.3-ah run 163 chiah tlinin an out vek!

Delhi tan wicket thum latu, Nepali bowler Sandeep Lami­chhane chu fak tlak a ni.

Bye bye Punjab
Kings XI Punajb-in over 20 khelh turah over 19.4 bak an tlin lo - run 153 siamin an out vek a, wicket li latu Lungi Ngidi an ngam lo. Run 54 siamtu Karun Nair awm lo phei se an mualpho a zual ngei ang.

Playoff khel chiang tawh CSK-in chak loh an tum lo. Su­resh Raina chuan run 64 ngawt rawn siamin a tawp thleng a dam a, batsman dang che ṭha lo mah se Indian batsman chet ṭhat zar CSK-in an zo.

Over 19.1-ah an target an umpha a, run 159 siamin wicket nga chiah an hloh.

Playoff chu
Sunrisers Hyderabad, Chen­nai Super Kings, Kolkata Knight Riders leh Rajasthan chu a sang pali a season khar an ni.

Pakhatna SRH leh pahnihna CSK ten qualifier 1 an khel ang a, a chak zawkin final an lut nghal ang. A chak lo zawk erawhin elimi­na­tor-a KKR leh Rajasthan inkhela chak zawk an hmachhawn leh ang.

Eliminator-a chak leh quali­fier 1 inkhela chak lote intumna hi qualifier 2 tih a ni a, he inkhela chak hian final an lut ve leh dawn a ni.