Naupangte hnena ka lehkhathawn

Football ringawt buaipui ka nih avangin ka thawnthu sawi tur hi football tho a ni a, mak inti kher lo ang - induh chuan ka pa pawh zawt rawh u, football hlir ka ni tak tak tak! Kum thum mi lek ka nih laiin ka pa chuan, ka chuan lenna tawk electric motor lem min leisak a, kan inpiah lawka khelmualah chuan chu motor chuan ka inkhalh phei ṭhin - chu thil chu ka la thutak em em a, footballer-in training ground a pan ang hi ka inchan ṭhin. 

Khelmual ka thlen ruala ka ngaihtuahna luahtu erawh inkhelh a ni leh mai a, ka ṭhianten an awh em em electric motor chuan khelmual kil khat bak a chang phak lo. Football chu ka duh chu a ni mai a, ka tan chuan chu chu engkim a ni. Ni e, chuvangin vawiina ka ziah thawnthu pawh hi football tho a ni a, chutihrualin beiseina hailanna tiin a sawi theih bawk - ngaithla turin football tui mi i nih kher a ngai lo. Kum 1993 khan, Bondy-ah chuan sum a la tam lo hle. Mahse, beiseina neitu kan ni a, chu beiseina chu kan pianpui niin ka hria. Beiseina kha suma lei ngai lo, a thlawna neih mai theih a nih vang pawh a ni mahna. 

Kan vengah chuan French, African, Asian, Arab leh hnam hrang hrang kan inchawhpawlh nuaih a, kan kim hle. Mi ṭhenkhat chuan khawpui daifema chengte hi a chhe zawng hlirin min sawi ṭhin a, mahse he hmuna cheng ve lo tan chuan eng ang tak nge a nih hriatthiam theih a ni lo. Misual chherchhuahna hmun ang maiin min sawi a, mahse khawvel hmun tinah misualte chu an awm a ni lawm ni? Ni e, khawi hmunah pawh harsatna tawka talbuaite chu an awm alawm. Thil tak tak zawk chu hei hi a ni - chutianga mi rothap hmel tak takte chuan ka pi tana in lam chakkhai mamawh an leisak hi ka hmu ṭhin a, mahse chutiang thil duhawm chu chanchintharah hmuh tur a awm leh si lo. Kan ṭhatna ni loin kan chhiatna ringawt an entir che u a nih hi. 

Bondy-ah chuan dan mak tak mai, mi zawng zawngin an hriatthiam kan nei. Kalkawnga i kal laiin mi 15 i tawk a, an zinga pakhat chauh i hria a nih chuan duhthlan tur i nei - i kut vai chunga i kalpel a nih loh chuan mi 15 chu i chibai vek tur a ni! Mi pakhat chauh kut i chibai a nih chuan a dang mi 14 chuan an theihnghilh dawn lo che a, eng ang mi nge i nih an hre reng dawn a ni - he dan ka thinlungin a vawng reng hi chu a nuihzatthlak ngawt mai. 

Nikum lawka FIFA’s Best Awards semnaah khan ceremony ṭan hmain ka chhungte nen kan tei kual a, Jose Mourinho ka va hmu fuh a ni. Jose nen chuan kan inhre sa a, mahse ṭhian pali panga vel a nei tel tlat. "Ka vai liam ang nge ka va chibai vek ang aw?' tia inngaihtuah chungin ka va chibai a, a ṭhiante pawh chu ka chibai vek a!

Mak tiin min en ho hlawm a, "En teh u, min chibai ve ania," tih hmel hi an pu a, ka pa lah a nuih a lo za em em a! "Heng zawng zawng hi Bondy-in a ken tel a nih hi," a ti a. Chu dan chu keimahnia bet tlat ang mai a ni a, kan nunpui tlat a ni. Bondy-ah chuan football piahlama thil hlu tak tak kan zir tel a, intluk tlang vek leh beiseina thuhmun nei vek kan nih avangin mi zawng zawng angkhata en turin kan zir a ni. Kei leh ka ṭhiante hian footballer nih kan suangtuah ngam lo a, ka ring phak lo a, ruahmanna kan siam thiam hek lo. Beiseina kan nei ve chauh zawk a ni. Naupang dang chuan an mut pindan bangah superhero thlalak an tarlang a, kei chuan Zidane leh Cristiano lem ka ngah em em thung! Ka len deuh hnuah Neymar-a thlalak ka bel bawk a, Neymar lah chu he thil hlui a hriat hian a nuih a za em em ringawt mai a ni - mahse hei erawh nidanga la sawi leh tham thawnthu a ni. 

Mi ṭhenkhat chuan eng vangin nge kan vengah chuan talent ṭha tak tak a tam em em tiin min zawt ṭhin a, kan tui tlan vang nge, Barcelona ang maiin tih dan danglam bik kan nei, tih chu min zawt ṭhin. Mahse, chutiang chu a ni si lo - AS Bondy ilo kal chuan club naran ve tak, building ṭhenkhat leh phul lem phah zawng i hmu ang. Mahse, keini tan chuan football hi a danglam tlat - kan tan chuan nitina kan tih tur thil a ni a, nitina tui leh chhang kan mamawh ang mai hian kan mamawh a ni. Kan sikula tournament kan neih ṭhinte kha ka la hre reng mai, pawl 6, 7, 8 leh 9-te kan intum ṭhin a, kan tan chuan chu chu World Cup a ni. €2 man plastic trophy  chu kan inchuh chu a ni mai a, mahse nunna leh thihna inkar ang maiin kan khel ṭhin. Thil nuihzatthlak tak pakhat a awm a, chu chu team tin inchawhpawlh ngai chu a ni. Ni e, mipa leh hmeichhia inthlanpawlh kan ni tur a ni! Mahse, hmeichhe ṭhenkhat chu an inkhel duh ngai lo a, kan dan a nih miau bawk si avangin kan thlem nasa thei asin aw! Hmeichhe pakhat phei chu a theihtawp a chhuah a, kan champion a nih phawt chuan milem chei tur lehkhabu thar ka leisak tur thu ka tiam nghe nghe a ni. 

Thil ka sawi uar deuhah in ngai mai thei a, mahse kan tan chuan engkim a ni tak tak a nia aw! €2 man lek nomawi kha Jules Rimet Trophy (World Cup nomawi) hlawhchhuah tum ang maiin theihtawp kan chhuah ṭhin. Kan zirtirtute tana enkawl kan hautak turzia kha ka ngaihtuah chhuak a, ngaihdam ka dil duh.

Ni khat chu Principal lehkha nen ka haw a, hrem ka nih theihna pakua lai a ziak. "Kylian hian a homework a ti lo, Kylian hian school-a ken tur a keng lo, mathematics class-ah football a sawi...," tihte a ni nuaih! Football thiam pangngai tak ka ni a, ka nun thlak danglamtu pakhat erawh Coupe 93 kan khelh kha a ni - khatihlai khan kum 11 mi chauh ka la ni a, semifinal kan inpetkai a ni. Gagny-a Stadium tak takah kan inkhel a, Nilaini a ni tih thleng hian ka la hria. Chutiang taka stadium lian leh mipui tamnaah chuan ka la inkhel ngai lo a, ka rilru chu hlauhthawnnain a khat a ni. Ka hlau tlat a, ka tlan hleithei lo! Ball ka tawk fuh mang lo a, inkhelh zawha ka nuin ka benga a rawn pawh dawr dawr kha ka theihnghilh tawh ngai lo ang. 

Ka khelh chhiat avanga ka bengah chuan rawn pawt a ni lo a, ka hlauhthawnna avanga rawn pawt a ni zawk. Ka nu chuan, "I damchhungin hei hi i hre reng tur a ni. Nangmah kha inringtawk ta che. Vawi 60 zet goal i khung lo a ni thei, mahse min engtin an ti lo ang che. "Mahse, hlauhna avanga i inkhel thei lo a nih chuan i damchhung zawngin chu hlauhna chuan a zui tawh ang che," a ti a, chu chuan ka nun pum hi a thlak ta - khelmualah hlauthawngin ka khel leh tawh ngai lo. Ka nu, ka pa, ka vengte leh ka ṭhiante tel lo chuan Kylian Mbappe hi engmah ka ni lo. 

Ka seilenna hmuna chawr chhuak ve tho lo tan chuan ka thusawi hi hriatthiam a harsa mai thei. Mahse, entirna kan hrilh ang che u. Kum 11 mi lek ka nih laiin London-ah Chelsea youth team nena training nei turin ka kal a, ka lawm lutuk kha kan venga ka ṭhiante pawh hrilh hman loin ka kal ringawt mai a ni. In lama ka kir hnuah ka ṭhianten ka kalna min zawh chuan, "London-ah Chelsea training ka zawm," tiin ka hrilh a, an awih lo hle! "Ka ti tak tak - Drogba pawh ka hmu alawm," ka ti a, an awih chuang lo. "Dawt sawi suh. Bondy naupang hi Drogba-a'n a hmu lo ang che," min ti tlat!

Chutihlai chuan phone pawh ka nei lo a, ka pa phone-a Drogba nena kan thlalak chu ka hmuh ta hlawm a ni. Mahse, ka ṭhiante rilruah chuan thikna emaw itsikna a lang lo reng reng - a nihna dik takah chuan ka tan chuan an hlim em em zawk a ni. Khatihlai, AS Bondy dressing room-a kan awmlaia an thusawite kha ka la hre reng mai. Chelsea-a kal ve an duh thu min hrilh a, mahse training camp chu a zo tawh si. Ka pa phone-a ka thlalak chu an en leh a, hlim tak hian, "Kylian, kal ve ang mai alawm kan nih le," an ti a nih chu! Chelsea-a ka hun tawn duhawm tak hnuah khan ka chhungte chu club lian zawka min kaltir turin ka ngen chiam a, an remti lo. A hunlai khan hrethiam lo mah ila tun hnuah erawh ka tana ṭha turin ruahmanna an lo siam reng tih ka hre tawh. 

Kum 10 chhung zet chu ka pa chu ka coach a ni a, French football academy ṭha takah zir mah ila kartawp apiangin kan inah ka haw a, ka pa semipro club AS Bondy tan ka khel ṭhin - ka pa chuan academy-a ka zir, thiam bik riau nia ka inhriatnate chu eng atan mah a ti ngai lo. Academy-a kan coach thurawn vawng reng chungin inah ka haw fo a, kan ke hman thiam loh lam chu kan hman thiam theihna tura theihtawp chhuah turin min hrilh ṭhin a, chu academy-ah chuan kan thiamnain hma a sawn zel theih nana beih chu kan thupui ber a ni. Mahse, Bondy erawh nun tak tak zirna hmun a ni thung a, chu hmunah chuan semipro league-a dinchhuah leh hnehna chan chauh chu kan thupui a ni mai. 

Vawi khat chu ka la hre reng. Bondy tan khelin mual sir lamah ball ka tlanpui a, chutihlai tak chuan academy lama kan coach thusawi kha ka bengah a rawn lut thut a nih chu - "Kylian, i ke veilamin pet rawh. "Ka ke veilam hmang chuan long pass pek ka tum a, ka tisual ta - kan khingpuiten min nawr let nan an hmang a, ka pa authawm kha ka la hre reng thei - tun thleng mai hian! "Kylian, academy-a i thil zir mawi tak kha kan mamawh lo. League kan khel a nih hi. Tuna i chet dan vel kha chuan duhtawkin in academy-a khelmualah chuan ti mai rawh," tiin mi au tehreng a nih kha. Kha thu kha ka bengah hian a cham ta reng a, ka theihnghilh thei ta lo. Ka pa khan ka kalsual dawn tih a hria a, lei rem min rahtir leh a tum reng a lo ni. 

Kum 14 ka tlinna piancham ka thlen hma khan hun duhawm tak ka tawng a, Real Madrid-in ka pa an rawn bia a ni. Chutihlai chu Zinedine Zidane-a'n sporting director hna a chelh lai a ni a, Zidane chuan an training ground-a ka che tla lai vel hmuh a duh avangin an training ground-a training ve turin min sawm a ni. Khatihlai khan scout tam takin ka inkhel an en ṭhin a, media lamin min bawh ṭan hle. Kum 13 mi lek tan chuan chung thil chuan pressure a ti sang em em a, a harsa ṭhin. Mahse, ka chhungte ka bulah an awm a, kan tan rem an ruat a, min venhim kha an tum em em mai a ni. Madrid-a ka kalna tur pawh an lo ti fel sa vek a, ka piancham thlen hmain min 'surprise' nan an hmang a ni ber mai. In awih kher lo mai thei - Madrid kan pan dawn hian tumah kan hrilh lo a, ka ṭhian hnai ber pawh ka hrilh lo. 

Kan khua chuan beiseina sang tak nen min thlir ang a, ka hlawhchham si ang tih chu ka hlau em em a ni. Airport aṭanga Madrid training centre kan thlente kha ka theihnghilh tawh lo ang. Zidane-a'n motor park-na hmunah min lo dawng sawng a, a car seat hma lam chu kawkin ṭhu turin min ti a, ka hamhaih vek a ni ber mai! Enge a chhan ka hre lo - "Pheikhawk phelh a ngai ang em?" tiin ka zawt a nih kha! Engvanga kha thil kha zawt nge ka nih ka inhre lo - mahse Zizou car-ah ka chuang dawn a, zawh a ngai alawm! Zidane a nuih chu a za hle. "Phelh lo e, lo chuang rawh," tiin min chhang zui a. Chutihlaia ka ngaihtuahnaah chuan ka mumang mai nia hriatna ka nei a, Bondy khaw chhuak Kylian ve mai kha ka ni si a, Zidane-a'n a car-ah min phur a maw?

A chang chuan a tak ngeia kan thil tawnte hi mumang ang mai a nih chang a awm ṭhin a, chutiang tak chuan Russia World Cup-ah khan ka awm tawh. World Cup hi chu a ropui em a, palzam theih a ni lo. Hun duhawm tak ka tawn zinga ka hriatreng pakhat a awm - kan match hmasa ber atana Australia kan hmachhawn ṭum kha. Khelmuala chhuak turin kan ding ran a, Ousmane Dembele lam chu ka va hawi a - kan nui a, kan lu kan thing kan thing ringawt mai a ni! "En teh, veng kilkhawra tlangval pahnih kha World Cup kan khel dawn a nih hi," ka va ti a, ani lah chuan, "Awih ka harsat zawk a ni," tiin min lo chhang a! Khelmual kan lut a, mi maktaduai 65 beiseina kan keng tel tih ka hria. Hnam hla an play lai khan ṭap mai thei dinhmunah ka ding hial a ni. Mak ka ti - khami ṭuma World Cup nomawi chawitute kha chawr chhuahna duhawm lo ve tak tak, hmun kilkhawr aṭanga chawr chhuakte kan ni nawk mai!