Real Madrid kan hneh thei ang - Klopp

Liverpool manager Jurgen Klopp chuan Champions League final-ah Real Madrid an hneh theih a rin thu a sawi. May 26 zan hian Kiev khawpuiah club pahnih hian European champion nih an inchuh dawn.

Klopp chuan, "Real Madrid hian tawnhriat an ngah zawk a, chu chu mihring nuna thil pawimawh tak a ni - mahse thil zawng zawng innghahna erawh a ni lo.

"Real tawnhriat ngahna hi tumna, rilru huaisenna leh thawhrimna hmangin kan hneh thei tih ka hria a, hei vang hian football hi mawi ka ti zual ṭhin," a ti a, a naute a ring tawk hle.

Huaisen takin...
Liverpool tan tun hi 2007 hnua Champions League final an luh hmasak ber a ni a, Real hi an champion a nih chuan season thum chhung a zawna champion thei hmasa ber an ni dawn thung.

Klopp chuan a naute tan rilru huaisen put a pawimawh zia a hai lo a, German coach chuan, "Rilru huaisen tak neih a pawimawh zia kan inhrilh ang," a ti a, Manchester City leh AS Roma laka an tih theih chu Real laka tih theih an inbeisei thu a sawi nghal.

Klopp chuan, "City lakah khan rilru huaisen put a harsa a, Roma-ah a danglam chuang lo. Mahse, chu chu kan ti thei miau si," a ti a, beiseina a nei sang.

Damdawi In lam!
Liverpool player zingah Joe Gomez, Alex Oxlade-Chamberlain leh Joel Matip chu final khel thei lo tur chiang an ni a, thla hnih chhung hliam vanga chawl tawh Emre Can chuan training a zawm thung.

Klopp chuan, "Ni 10 kal taah kha chuan Can hi a dam hman kan beisei lo. Tunah erawh training a zawm leh tawh. Player zawng zawng tan kawng a inhawng a, a inlan dawn leh dawn loh chu hunin a hril ang," a ti a, Germany World Cup squad-a koh loh player chu a inlan dawn leh dawn loh a sawi chiang lo.

Liverpool tana chanchin lawmawm dang chu James Milner-a'n training a zawm leh tawh hi a ni. English midfielder hian hliam vangin an league match hnuhnung berah khan Brighton a hmachhawn ve lo.

Alonso ngaihdan!
Spain midfielder Xabi Alonso-a'n player a nih laiin Liverpool leh Real Madrid tan a khel hman ve ve a, Champions League-ah nomawi a chawipui ve ve bawk.

Alonso chuan, "Liverpool hian hnehna chang tur chuan tihsual nei miah lo khawpa an khelh ṭhat a ngai ang. Madrid chakna leh chak lohna lai zawng zawng an zirchian a ṭul dawn a ni.

"Madrid hian Liverpool an hmachhawn avangin an khelh dan an thlak ka ring lo a, khelh dan phung an neihsa hi an bel em em zawk. A nihna taka sawi chuan game hautak apiangah an khel ṭha," a ti a, Reds aiin Madrid a ring zawk.