Messi kianga khel tur player 22 a chiang

FIFA World Cup-a Lionel Messi khelh pui tur player 22 hming tihchian a ni ta a, an zinga 14 chu World Cup-a an inlan vawi khatna tur a ni. Argentina manager Jorge Sampaoli-a'n a koh loh zinga langsar tak chu Serie A season liam ta a goal 29 khungtu Mauro Icardi a ni.

Premier League champion Manchester City aṭangin striker Sergio Aguero leh defender rinrawl Nicolas Otamendi te an awm, EPL player dang Manuel Lanzini, Sergio Romero, Marcos Rojo leh Willy Caballero te hming a lang bawk.

World champion vawi hnih ni tawh Argentina manager Sampaoli chuan, "Position tina khel tur player-te ngun taka kan zir chian hnuah squad hi kan thlang fel," tiin Russia pan tur thlan chungchangah an fimkhur thu a sawi a, captain Lionel Messi nen mimala an inbiak thu a sawi bawk.

Sevilla manager hlui chuan sawi zawmin, "Ka player thlante hian ball nena an tih tur an hria, Argentina player-te hian ropuina chuang turin theihna an nei tawk," tiin a sawi. Argentina hi Group D-ah Iceland, Croatia leh Nigeria te nen an awmkhawm ang.

Rinkai?
Argentina hian World Cup hnuhnung berah khan final an thleng a, hun pek belha goal khat an chhuah avangin Germany an ngam lo. Ram tan major tournament final vawi thum a khelh tawha chak ni hmel la hmu lo Messi hoa inlan tur hi rinkai zingah an tel phak leh ang.

Qualifier lamah Sampaoli nauten beisei an phak lo a, an match hnuhnung berah chak ngei ngei ngai chungin Ecuador an lenchilh, minute khatna lekah goal an chhuah avangin an dinhmun a chhe hman hle. Mahse, mamawh chhanna ni ṭhin Messi goal thum hmangin an inpet tling thei hram.

Qualifying match 18 khelh aṭanga goal 19 chauh khung thei Argentina hian hmatawng an nei ṭhat zia inhrilh nawn a ngai lo a, chutihrualin an match hnuhnung lama an khelh dan thlir chuan insiamṭhat an ngai - goal hmaah an hriam thar a nih loh chuan nomawi beisei huai a har thei thung.

Icardi tel lohna
Argentina player zinga a tam zawk hi Europe-a inkhel an ni a, a bik takin an tlarhma lam an langsar hle. Captain Messi chu khawihchet thiang lo a ni a, midang erawh siksawi kual ṭhin an ni.

Inter Milan striker leh captain ni bawk Icardi-a'n Serie A match 34 aṭangin goal 29 a khung a, Italian club hi season thara Champions League khel turin a hruai kai - mah se World Cup khel tura koh zingah a tel lo.

Tlarhma laia khel thei turin Juventus striker Gonzalo Higuain leh Pep Guardiola duhlai Sergio Aguero te an awm, anni pahnih baka koh Messi leh Paulo Dybala te hi a sir lama tlartir theih an ni. Inter striker Icardi hi ram tam takah chuan rinawl ni phak tur a ni a, chutihrualin Argentina bikah chuan a elpui dangte nena khaikhin chuan a tel phak lo hi a mak hran lo.

Famkim lohna
Hmatawng nei ṭhain goal khung harsat lo mah se Argentina hian goal an chhuah zel chuan thlen san a harsa dawn. Sevilla midfielder Ever Banega leh AC Milan rinrawl Lucas Biglia te an rintlak viau tura ngaih a ni a, Paris St-Germain winger Angel Di Maria pawh a ṭha tawk tura ngaih a ni - player dang erawh ram dang aia an ṭhatna lai sawi dawn pawhin a tam bik lo ang.

Liverpool leh Barcelona tana a khelh lai defender atana hman fo Javier Mascherano hi a kum tam deuh tawh mah se tlarhnung pui turin a la ṭangkai thei dawn a, defender siksawi nasa tak Pep Guardiola hnuaia nghing ve lo Otamendi hi ram tan pawh rinrawl a ni ang.

Mahse, Sampaoli-a'n Manchester United tana khel phak lo defender Marcos Rojo leh goalkeeper Sergio Romero te a chhawr a ngai dawn, River Plate goalkeeper Franco Armani hi ram tana la inlan ngai miah lo a ni. Tlarhnung sir leh si ban nghak hi an ṭhat tawk lohna lai tak ni thei tur a ni.