Hammers boss thar Pellegrini

West Ham chuan an manager thar atan Manuel Pellegrini an lakluh thu an puang a, kum 64 mi manager hian London Stadium-ah kum thum chhung hun hmang turin contract a ziak.

Manchester City manager hian kar hmasa khan Chinese Super League club Hebei China Fortune chu a chhuahsan a, David Moyes hmun ruak a luah dawn ta a ni.

West Ham joint chairman David Sullivan chuan, "Manuel hi attacking football lo hmingṭhatpui tawhtu a ni a, a player te an ṭhatna lai ber a haichhuah sak bawk ṭhin. Kan squad neihsa ṭha taka a duan bakah player talent nei ṭha a hruai luh theih kan beisei," a ti.

Pellegrini hian Hammers zawm tur hian China-a a hlawh zat aṭangin a sum hlawh tur hi tam tham takin a ti hniam nia sawi a ni a, a hlawh tur zat tak hi chiang taka tarlan awm lo mah se Hammers manager ni tawh zinga hlawh hnem ber a ni ang.

Khawthlang media te chuan Chilean manager hian kum khatah pound maktaduai nga aṭanga sawm inkar a hlawh dawn niin an sawi a, pound maktaduai nga hi hlawh pawh ni se City a enkawl lai aiin a hlawh hnem zawk dawn tihna a ni.

Pellegrini hian City a enkawl lai khan Premier League nomawi pakhat bakah League Cup nomawi pahnih a lo chawipui tawh a, 2015-16 season-a a vawi khat nana Champions League semifinal an luh kha City-in CL-a an thlen san ber a la ni reng.