LeBron leh Cavs an hawi sang

Boston Celtics-in Eastern Conference finals game hmasa pahnih TD Garden-a khelhah Cleveland Cavaliers an hneh nghal ve ve a, NBA Finals an hnaih hman hle. Amaherawhchu, Quicken Loans Arena-ah Le Bron James-a hote team dang daih an ni a, game 3-ah 116-86 a an sawp hnuin nimin zing khan 111-102 in an hneh leh bawk.

Cavaliers leh Celtics te 2-2 in inhnehtawk chiah mah se match hnuhnung pahniha chak Cavs te an hawi sang zawk. May 24, Ningani zing dar 6:00 hian TD Garden-ah game 5 khelh a ni dawn a, he inkhel hi a 'vawrtawp' a nih theih avangin hmaih phal chi a ni lo ang. Tukin zing dar 6:30 hian Western Conference finals game 4 chu Oracle Arena-ah khelh a ni dawn a, Golden State Warriors-in Houston Rockets lakah 2-1 hma an hruai mek.

Bul ṭan ṭha
Cleveland-in an 'home'-ah bul an ṭan ṭha a, quarter hmasa berah 34-18 in hma an hruai nghal a, Celtics an tho chhuak thei tawh lo.

Boston hian quarter hnuhnung pathumah a chak zawkah an ṭang vek a, amaherawhchu Cavs aia an point hmuh tamna hi point khat, hnih leh li te a nih avangin quarter hmasa bera an inthlauhna hi point 16 zet a nih vangin hun tawpa an inthlauhna pawh point kua zet a la ni.

King James
LeBron James hian NBA Finals kalkawng a hre bel a, Celtics hian a dan dan tur an duang chhuak vat a nih loh chuan kum 10 chhung a zawnin finals an lut pha dawn lo tihna a ni.

Nimin zing inkhelah King James hian point 44 zet a nei pha a, a teammate zinga a hmu sang pathum Kylie Korver (14 pts), Tristan Thompson (13) leh George Hill (13) te hmuh belhkhawm ai pawhin a tam zawk.

James hian playoff bika Kareem Abdul-Jabbar-a'n field goal-a record a siam tawh chu a khum bawk. FG hi sana kal laia an point neih hi a ni a, basketball legend Abdul-Jabbar hian Milwaukee Bucks leh Los Angeles Lakers tana a khelh laiin FG aṭangin 2,356 points a nei a, he record duhawm tak khum tur hian point ruk chiah a mamawh a, hun pawh a mamawh rei lo.

LeBron-a hnungah hian Abdul-Jabbar bakah basketball legend dang Michael Jordan, Shaquille O'Neal leh Kobe Bryant te an intlar a, an hming thlir hian Cavaliers guard ropui zia a lang.

Kum 33 mi LeBron chuan, "Ka rawn chawr chhuahna hi khaw lian lo, helai hmun (Cleveland) chhim lam mel 35 a awm a ni a. Tunah chuan basketball mi ropui tak tak nen huang khatah min dah a, a nawm dan a dang hle. Score zat leh field goal neih zat in hria, hei hi naupang pakhat point neih tam ngai pawimawh ṭhin lo chunga thleng a ni," tiin a hun tawn hlimawm dan a sawifiah.

Boruak a sang dawn
Playoff-ah hian 2-0 a hnufual tawh team 299 zinga tho chhuak leh thei chu team 19 chiah an awm a, Cleveland hian 300 zingah 20-na nih an tum dawn. Game hnuhnung an chak dan thlirin TD Garden-a vawi hnih an chak loh zawha thil harsa tak kha thil theih niin a lang tawh.

James chuan, "Thil awm dan kan hria, an fan-te an nung ṭha em em. Kan home-a kan khelh ṭuma kan rilru put ang bawka kan khelh theih chuan hnehna kan chang thei ang," tiin chak a inbeisei.

Chutihrualin Celtics hi an zinna hmunah result an nei ṭha ṭhin lo a, tun ṭum playoff-ah hian vawi sarih an khelhah vawi khat chiah 'away' ah an chak a, vawi ruk an chak lo. Chutihrualin TD Garden-ah erawh Boston hian tun playoff-ah record an nei ṭha a, vawi kua an khelhah an la chak vek.

Boston hi an dinhmun a ṭha leh tawh lo zawka ngaih a ni a, hei vang hian game 5 hi a hmuhnawm dawn. Thlirna dang aṭanga

chuan Boston hian an home-a hnehna an chang a nih chuan Cleveland dinhmun a derthawng dawn a, Quicken Loans Arena-a game 6 khelh tur ni mah se deciding game chu TD Garden-a khelh tur a ni.