Champions League final ticket a to

Kiev khawpuia Liverpool leh Real Madrid inkhel turin ngaihven a hlawh a, Champions League final ticket pangngai hralh zawh a nih hnuah final ticket hi website ṭhenkhatin manto uchuak takin an zuar chhuak.

Liverpool leh Real Madrid te hi ticket 16,626 ve ve pekchhuah an ni a, Reds hian an ticket hi an hralh zo tawh. Mahse, ticket zawrh chhawnna lamah ticket hi zawrh leh a ni a, hralhchhuah a nih laia a man let 20-a to zawkte a awm!

Ticket zuarchhawng ṭhin website pakhat Ticketbis chuan Real Madrid fan-te ṭhutna tura ruahmana ticket man tlawm ber chu £410 (Rs. 37,534) in an zuar chhuak a, Liverpool lam ṭhutna tura man tlawm ber chu £1,337 (Rs. 1,22,399) a ni.

Ticketbis-a ticket man tlawm berte hi official taka zawrhchhuah a nih laia category four-a dah £61 (Rs. 5,584) man te an ni! Category 2-a ticket £280 (Rs. 25,633) man chu £14,723.39 (Rs. 13,47,900)-in zawrchhuah a ni hial.

Britain-ah chuan kum 1994 khan football ticket zawrhchhawn hi khap a lo ni tawh a, mahse ticket zuar chhawngtu te hi UK pawn lam an nih avangin Britain sorkar tan hmalak theih a ni lo.

Ukraine khawpui Kiev-a inkhel turah hian buaina a tam hle. Olympic Stadium-a inkhel en turin mikhual an tam dawn tih hriain Kiev khawpuia hotel te chuan uchuak takin hotel-a thlen man an ti sang vak a, Kiev khawpuia fan-ten inkhel en tura zin turte chu an thlen theih tur thu thuchhuah siamin ruahmanna an siam hial!

Ticket leh hotel man chauh a sang lo a, thlawhtheihna ticket thlengin tih to a ni. Ukraine aṭanga UK-a let leh tur chuan Liverpool fan-te hian £1,400 (Rs.1,28,167) vel an sen a ngai ang.