World Cup-a England captain tur Kane

England manager Gareth Southgate chuan nimin khan captain tur a puang a, Tottenham Hotspur striker Harry Kane-a'n World Cup-ah captain hna a chelh ang.

Three Lions hian Wayne Rooney hnuah captain nghet nei loin Gary Cahill, Joe Hart, Jordan Henderson, Eric Dier leh Kane ten captain armband hi an hreng a. World Cup-a captain tur hian Liverpool captain Henderson leh Kane te an khaikhin a, English striker hi a buk a rit ta zawk.

Kum 24 mi Kane hian ram tana a captain hmasa ber chu nikum June thlaa Scotland nen qualifier-a an inkhelh ṭum kha a ni a, hemi ṭum hian English striker hian injury time-ah siphurh sutna goal khungin 2-2 in an inhnehtawk a, ṭum thum dang captain armband a hreng leh bawk.

Kane chuan, "Chawmawina hlu tak a ni. Naupan tet aṭang­in ram tana khelh hi kan duhthusam a ni a, captain nih chu chumi aia sang leh chu a ni. World Cup khelh hun ka nghakhlel a, ka phur tawh a. Team captain ka ni tur hi ka ngai hlu hle. Chutihrualin a hmaa Kane-a tho kha ka la ni a, engmah a danglam lo. Team tan theihtawp kan chhuawh zel ang," tiin manager thutluknaa a lawm thu a sawi.

England boss Southgate chuan, "Harry theihna neih hi a chungchuang a ni," tiin captain atana a ruat Kane a fak. Spurs striker hian season hman zawh takah inelna hrang hrangah goal 41 a khung a, a club khelhna Tottenham chu league-ah pathumna a nih pui a. Ram tana vawi 23 a inlanah goal 12 a khung tawh bawk.

Southgate chuan sawi chhunzawmin, "Ka hmuh danah chuan thla 18 kan thawhho chhungin team kaihhruai châkna a nei a, midang huikhawm a thiam bawk. Tum sang tak a nei a, chu chu player dang tan fuihna ṭha a ni a. Hun rei tak chhung chu khawvela player ṭha ber zinga mi ni phak khawpin a khel ṭha a ni," a ti.

England hian June 18 hian match hmasa berah Tunisia an hmachhawn dawn a, Three Lions awmna Group G-ah hian Belgium leh Panama te an awm ve bawk.