Peru captain tan a elpuiten dilsak
FIFA World Cup 2018 khel thei lo tura hrem tuar mek Peru captain Paolo Guerrero tan group khata an awmpui Australia, Denmark leh France captain te ṭheuhin a hremna hi hlih sak rih turin FIFA hnenah dilna an thlen!
Guerrero hi October khan Argentina nen World Cup qualifier-a an inkhelh zawhah a thisenah damdawi hman phal loh hmuh a ni a, mahse kum 34 mi striker hian a thingpui in aṭanga damdawi chu a thisena awm a nih thu a sawi.
FIFA chuan a tirah Bayern Munich striker hlui hi thla 12 chhung atan an hrem zet a, ngaihtuah nawn tura dilna thlen a nih hnuah thla rukah tihtawi sak a ni. He thuchhuah avang hian Paolo hi World Cup khel tura ngaih a ni a, mahse tun hnai khan hremna dang a chhuak.
World Anti-Doping Agency chu FIFA thutluknaah hian lungawi loin Court of Arbitration for Sport (CAS) hnenah an zualko a, sports rorelna sang ber CAS hian thla 14 atan a hrem belh ta zawk.
Peru tan kumin hi kum 36 hnua an World Cup hmasa ber tur a ni a, Guerrero hian kuminah a khel a nih loh chuan kum 34 mi a nih tawh bawk avangin World Cup a khelh a rinawm tawh lo.
He dinhmun hi World Cup-a an elpui tur ram ten an hriatpui a, Australia captain Mile Jedinak, Denmark captain Simon Kjaer leh France captain Hugo Lloris te chuan khawvela football player intelkhawm pawl FIFPro kaltlangin FIFA hnenah lehkha hi an thawn.
Paolo ang thoa mahni ram captain pathumte hian FIFA chu World Cup atana Peru captain chu hrethiam a, a career-a a hun tawn san theih ber hunah duhsakna a chunga lantir turin an ngen.
Flamengo striker hian Peru tan match 86-a khelhah goal 32 a khung sak a, ram tana goal khung hnem ber a ni.