French Open atan Sharapova a phur
World number 1 hlui Maria Sharapova chuan tun hma lama hlawhtlinna a lo chan tawhna French Open khelh a chak tawh thu a sawi a, a coach hlui nen an thawkdun leh thei chu a lawm thu a sawi bawk.
Grand Slam vawi nga champion tawh Sharapova hian 2012 leh 2014 khan Roland Garros-ah hian hlawhtlinna hi a lo chang tawh a, kumnah hian rinkai a ni phak lo ang - mahse player hmachhawn chakawm tak tur chu a ni bik lo.
Russian nula hi damdawi hman phal loh hman vangin thla 15 hrem tawk tawh a ni a, hremna a hman zawh hnuah hlawhtlinna lian a la chang leh lo. Court chhungah hmasawnna hmuh tur nei mah se pawn lamah boruak dang a nei zeuh zeuh a, sawisel pawh a tawh phah fo a ni.
World ranking chhuak thara 29-na Sharapova chuan, "Madrid leh Italian Open-ah te khan ka khel chhia ka ti hran lo, vanneih tawk loh vanga chak lo mai ka ni. Player ṭha dangte nen kan inel tawk chho leh mek a, clay court inelna lianah chuan beiseina pawh ka nei sang ve tawh hle," tiin a sawi.
Tun hma lama a coach ni ṭhin Thomas Hogstedt nen an thawhdun leh chungchang sawiin Sharapova chuan, "A rilru put hmang leh min khelhtir dan phung hi ka duh chi a ni a, training kan neih dan leh kan hmalak chhoh danah lawmna tur a tam hle," a ti.