Penalty kiantu Lionel Messi a ropui
Ballon d'Or dawng tur vote thlak lai a ni a, mimal chawimawina sang dawn châkin player ropui rual an phet suau suau lai boruak a ni. Hetiang boruak karah hian Lionel Messi chuan Paris St-Germain tana a hattrick hmasa ber siam theihna remchang nei mah se Kylian Mbappe a kian!
Argentina captain hian 2-1 a an hniam hnuah goal hnih khungin PSG hi RB Leipzig lakah 3-2 in hnehna a chanpui. Paris club hian point sarih hmuin Champions League group A hmahruaitu an ni; an hnuaiah Manchester City (6 points) an awm.
Last 16 lut turin PSG dinhmun a ṭha zel a, chak lo Leipzig erawh tun season UCL match thum an khelh tawhah an tlawm vek. Manager thar Jesse Marsch kaihhruaina hnuaiah hian inelna hrang hrangah vawi li chiah chak ni hmel an la hmu.
Mikhual tlangnel
Thawhlehni zan Le Parc des Princes-a inkhelah PSG lamin hliam tenau vangin Neymar an chhawr thei lo, nipui laia an lakluh Sergio Ramos pawh a la inlan thei lo. Goal veng turin Gianluigi Donnarumma aiah Keylor Navas thlan a ni.
Costa Rica international Navas hian a tir lam minute 10 pawh a liam hmain hna hautak zet vawi hnih a nei hman. Andre Silva-a ball tauh a dansak a, a hnu lawkah Konrad Laimer-a shot chu a ke in a lo dang hman hram bawk.
Mahse, goal nei hmasa erawh PSG an ni. Paris club lianin counter-attack aṭangin an vaw let, Julian Draxler hnen aṭanga a ball hmuh chu Mbappe-a'n chak tlana tlanpuiin, amah petu pe let loin tawih zetih minute 9-naah goal hmahruai a khung.
Amaherawhchu, minute 28-naah ven loha awm Angelino siamsak chu Andre Silva-a'n khungin si phurh a sut a, minute 57-naah Leipzig lamin Nordi Mukiele hmangin hma an hruai ta zawk. Goal an chhuah dan pahnihah PSG tlarhnungin an tih tur ang an ti tawk lo.
Mamawh chhanna
Anmahni mualah 2-1 in an hnufual a, mualpho thei dinhmunah an ding. Chak lo ta se media lam titi tur chu Mauricio Pochettino ni loin Lionel Messi a ni leh ngei ang, forward ṭha mi Messi chungah mawhphurhna a sang leh ta hle.
Mahse, PSG fans lamin an la hriat chian loh pakhat a awm, chu chu 'Messi hi boruak sanga buai chi a ni ve lo,' tih hi. Barcelona captain hlui hian Mbappe-a ball pek chu goal ban a tih per a, a per let hi minute 67-naah goal line bul aṭanga chhuih lutin 2-2 a ni chiah.
France international Mbappe-a'n penalty a hlawh chhuak zui a, a pettu chu Messi a ni. Keeper Peter Gulacsi-a'n vanneihna zawngin goal sir lam a zuan, hetih lai hian Messi erawhin inringtawk takin minute 74-naah goal laiah (Panenka) a chhuih lut keuh.
Hun tawp hma chiahin PSG hian penalty an hmu leh a, goal hnih khung tawh Messi-a'n hattrick siam theihna remchang nei mah se Mbappe a kian a, amaherawhchu rawlthar duhawm hian a hlah - club tana penalty a zawna vawi 11 khungtu a vannei ta lo.
A ṭha ber a ni - Mbappe
Goal a khung baka penalty hlawh chhuaktu Kylian Mbappe chu Player of the Match atan thlan a ni a, France international hian a khelhpui Lionel Messi chu khawvela player ṭha ber a nih thu a sawi. Penalty leh Messi chungchang sawiin Mbappe chuan, "Thil pangngai a ni a, zahna lantirna a ni bawk. Messi hi khawvela player ṭha ber a ni a, kan hnena a lo khel ve hi kan tan chuan a hlu takzet, penalty a awm chuan a pet ang, a hnuhnung zawk kha chu 'pet rawh', min ti," tiin a sawi.
Messi hian nipui bazar lai khan PSG hi a zawm a, goal thum a khung ta. Leipzig hma hian Manchester City lakah goal ropui a lo khung tawh bawk a, tunah chuan UCL-ah club 37 laka a goal khung belhkhawm chu goal 123 a tling ta. PSG manager Pochettino chuan, "Kylian leh Leo chungchangah chuan sawi tur ka nei tam lo. Inkhel harsa leh khelh ṭhat tawk loh changa hnehna chang tur chuan anni anga class hi kan mamawh ṭhin," tiin a sawi