Newcastle leh Bruce an inṭha ṭhen

Newcastle United-in neitu thar an neih aṭanga ni 13-naah manager Steve Bruce-a'n inhriatthiam tawnnain a hna a kalsan. Magpies hian league match riat khelh aṭangin point thum chauh an hmu a, relegation zone-ah an awm mek.

Kum 60 mi Bruce hian kum hnih aia rei hret Newcastle hi a enkawl a, Premier League-ah 13-na leh 12-na a nihpui bakah FA Cup leh League Cup-ah quarterfinal a luhpui ve ve.

English manager Bruce chuan, "Newcastle United kaihhnawih zawng zawng chungah club danglam tak min enkawltir avangin lawmthu ka sawi. Coaching team, player leh support staff-te an thawhrimna avangin an chungah ka lawm. Tun season leh a hnu zel atan club hi duhsakna ka hlan," tiin a sawi.

Newcastle United hian kartawp hian Crystal Palace an hmachhawn dawn a, Magpies hi Graeme Jones-a'n a enkawl lailawk ang.

Kum 51 mi Jones hian Championship club Luton Town a lo enkawl tawh a, Euro 2020-ah khan Gareth Southgate-a coaching staff-ah khan a tel. Magpies hian manager nghet erawh an zawng pah reng a, club thu chhuak chuan manager atana an dawrte hming an tarlang lo.

Newcastle United neitu thar Saudi Arabia Public Investment Fund te hausakna hi pound maktaduai 305 a ni a, Premier League club neitu zingah an hausak fal nalh avangin Magpies hi season rei lote chhungin khawvel club ṭha zingah an awm thei tura ngaih a ni.