Salah neitu Liverpool-in Atletico an ngam

Champions League ropuina hmuhtirin kan awm leh ta - Thawhlehni zan khan group stage inkhel hmuhnawmah Liverpool chuan 3-2 in Atletico Madrid an hneh a, an ke lehlamin last 16 an rap tawh.

Liverpool-in Mohamed Salah an nei a, Egyptian forward hi Reds tana danglamna thlentu a nih chhunzawm zel. Salah hian Liverpool tan goal hnih a khung a, Naby Keita chuan goal khat a khung ve bawk.

Atletico tan Antoine Griezmann chuan goal hnih khung mah se a fimkhur loh vangin red card a hmu a, French striker-in a club hluia a kir hnua a khelh ṭhat berah hnawhchhuah a tawk.

Liverpool-in match thum an khelhah hnehna an la chan vek avangin point kua an hmu a, group B-ah hmahruaitu an ni. A hnuaiah an hneh tak Atletico leh 1-0 a AC Milan hnehtu Porto-ten point li ve ve an hmu a, Milan-in point an la nei ve lo!

A rei lo
Wanda Metropolitano stadium hian Liverpool fans tan danglamna tak a nei - kum 2019-a Champions League nomawi an chawina hmun a ni a, a hnu season-ah Atletico-in 1-0 a an hnehna khelmual a ni bawk.

Chutiang taka Reds fan-te thinlung luahtu stadium-ah chuan Liverpool an lenglut a, kum 2020-a last 16 aṭanga pet chhuaktu team laka phuba la turin an nghah rei a ngai lo.

Salah chuan minute riatna lekah mawi zeta ball a lakluh hnuin goal hmahruai a khung a, player naran tana goal khung theih loh a nih rualin Atletico tlarhnung lamin an tih tur an ti tawk lo bawk.

Fans tam tak ṭawiawmna nen pawh Spanish champion an tho lawk thei lo. Minute 13-naah Naby Keita a inlar a, goal khung khat ve tak midfielder hian mawi zetin a volley goal.

Hero to zero
Liverpool-in an goal hnihna an khunga rilrua lo awm chu goal eng zat tak khung ang maw, tih chu a ni a, mahse, Atletico-in mahni mualah rei tak hnufual an tum lo.

Fapa tlanbo kir leh Griezmann-a'n amah duh tawh lotute hmangaihna hlawh let turin minute 20-naah Koke siamsak aṭangin si phurh a rawn sut ṭhen a, thawm chu ring tak a ni.

French striker hian a duhtawk mai lo. Chawlhlawk hman a nih hmain si phurh a sut zo a, Luis Suarez aia bul ṭantir Joao Felix-a'n ṭha taka ball a tlan luhpui hnuah Griezmann tan a siamsak a, forward 'fing' a ni tih pholangin ṭha takin a khung.

Atletico-in inkhel an thunun zui a, Liverpool an talbuai. Mahse, minute 52-naah si phurh sut zotu Griezmann-a'n ball dawn a tumna lamah a ngaihtuah tawk lo a, khingpui tana hlauhawm khawpa a ke a khai kan avangin red card pek a ni.

Reds tan lawmna
Player pakhatin Atletico an tlem sawt a ni mai lo a, goal hnih khungtu hnawhchhuahsak an ni. Hetah hian Atletico vanduaina a tawp mai lo a, a bul inṭanna chauh zawk a ni.

Spanish centre back Mario Hermoso chuan ṭul lo takin Diogo Jota a ti tlu a, penalty a chawi. Penalty hi Salah chuan Reds tana Champions League-a a goal 31-na turin a khung a, he inelnaa Liverpool tana khung hnem ber Steven Gerrard (30 goals) record a khum.

Egyptian forward hian tun season inelna hrang hrangah match 11 khela goal 12 khungin assist vawi li a nei a, match kua chhung a zawna goal khung tawhin Liverpool player zingah hetiang ti thei dang an awm lo.

Atletico hian si an phurh hnuah Jota-a'n José Gimenez a tih tluk avangin penalty an hmu zet a, mahse, referee-in VAR a rawn hnuah a thutlukna a sut avangin Atletico an vanduai a, Liverpool an chak.

Fight dik tak!
Liverpool-in awlsam takin goal hnih an khung a, a tawpah vannei takin an chak. Red card leh penalty piahlama Griezmann-a'n Alisson chauh a hmachhawn chunga a pet goal lohte chu uiawm tak a ni.

Reds manager Jurgen Klopp chuan, "Inkhel hmuhnawm tak a ni a, mak ka ti hran lo. Atletico nena intawn chuan thleng ve tur rengah ka ngai. Mihring ngaihtuahna hi kan hmelma lian ber a ni thei - goal hnih kan khung hnuah game kan thlir sual a, kan chetsual avangin goal hnih kan chhuah ve leh a ni.

"Atletico an lungawi lo tih ka hria a, ka hrethiam. Mahse, kan penalty kha a dik thlap a, an penalty an sut sak pawh ka hmuh danah chuan a dik. Red card an hmu kha an vanduai ka ti a, mahse, khatiang ang kha red card hmuhna tur chu a ni lawi si. Kan ṭhat dan bera kan khel lo chungin point thum kan hmu a, chu chu hmasawnna a ni," a ti.

Diego Simeone-a'n inkhelh zawhah Klopp chibai duh loin dressing room a pan tlang a, Argentine coach chuan, "Inkhelh zawhah coach ka chibai vek kher ngai lo a, ka ngaihdanah chuan thil ṭul ber pawh a ni lo. Mahse, kan inhmu leh ang a, lawm takin ka chibai ang," a ti a, mimala German coach huatna a neih loh thu a sawi.