Porto lakah Milan an tlawm

European club ropui ni ṭhin AC Milan an ropui hleithei lo - Champions League-ah FC Porto chu 1-0 in an ngam lo a, group B-a club pali zinga chak la nei ve lo awmchhun an ni.

Liverpool laka 5-1 a an mualpho hnuah Porto-in an rilru paukhauh an pholang a, an mikhual Milan lakah Luis Diaz chuan minute 65-naah goal awmchhun a khung.

Italian club-in a chhanletna tur an nei lo a, a tawpah 1-0 in Porto an chak a, last 16 luh beiseina an neih chhunzawm ve zel.

Portuguese club hi an vanneih zan ni se goal tam zawk khung thei tur an ni; 53% ball chang chungin vawi 20 ngawt shot an nei a, ṭum danga a khung ṭhinnaah Mehdi Taremi chuan a khung tlat lo bawk.

Iranian forward hian yard 12 vel lek aṭangin uiawm takin a hlah a, a tauh goal tura ngaih chu a ti goal thei lo bawk - tun season match sawm a khelh aṭanga goal nga khung tawh forward tih atana mawi lo a ni.

Goal khungtu Díaz-a'n inkhel ṭantir lamah post a tih per bawk a, second half-a a chance neih erawh a hlah lo - tun season match 11 a khelh aṭangin goal sarih a khung ta.

Colombian forward goal khung danah Milan lamin sawisel tur an nei - goal luhna kawngah Taremi chu Milan midfielder Ismael Bennacer lakah a foul niin a lang a, mahse, referee Felix Brych-a'n ngaihdan dang a neih avangin goal-ah pawm a ni.

Milan tan Olivier Giroud chuan goal hma-hruai khungna remchang nei mah se French forward hian mahnia khung mai turah a ṭhiante tan a siamsak a, an chance neih ṭhat a khawhral.

Giroud hi minute 58-naah Zlatan Ibrahimovic chuan a thlak a, mahse, kum 40 mi striker hian danglamna a thlen thei bik lo a, last 16 lut turin beiseina a tlem ta hle.