Mizo boxer tan theihtawp ka chhuah - Mujtaba Kamal

Mizo tlangval Lalrinsanga Tlau chuan WBC youth champion a nih hnua a fight hmasa ber chu Dubai-ah October 23, Inrinni zan dar 10:35 hian a nei dawn a, Georgian boxer Ilia Beruashvili a hmachhawn dawn. Khawhruhlian tlangval hlawhtlinna phena mi ṭangkai chu Grassroot Boxing Promotions and Management dintu Mujtaba Kamal a ni.

Tu nge Kamal?
Mujtaba Kamal hian kum 10 mi a nih aṭangin boxing a luhchilh ṭan a, kum 19 hnuai lam inelnaah kum 2000 khan National Championship inelnaah best boxer-ah an thlang.

India aiawhin junior leh senior inelnaah a feh chhuak tawh a, kum 2001 khan Asian Boxing Championship-ah gold medal a la. Kamal hian national championship vawi 12 a hmachhawnah vawi 11 medal a la a, kum 2005 thleng khan India aiawhin a feh chhuak bawk.

Kum 2005 hnu lamah profes-sional boxing a luhchilh a, a fight hmasa lam hi buaipuitu ṭha a neih loh avangin professional boxing record ziahna 'boxrec' ah dah a ni lo.

Boxrec-a a record awmchhun chu a chak loh ṭum a ni a, July15, 2011 khan Chinese boxer Xingxin Yang a hmachhawn ṭumin a khabe-ah hliam na tak a tuar a, a inkhel zui thei ta lo.

Boxing Promoter
Mujtaba Kamal chuan, "Professional boxing-a ka thlen san loh chhan hi buaipuitu ṭha ka neih loh vanga ni a, Indian boxer-te hian ka tawn ang hi tawng ve lo se ka duh. Chuvangin Indian boxer tana theihtawp chhuah hi ka duh," tiin Grassroot Boxing Promotions and Management a din chhan a sawi.

Sangtea a hmelhriat dan sawi zuiin Kamal chuan, "September 2009 khan Delhi-ah Sangtea inhnek hi ka hmu a, boxer ṭha a nih nghal avangin thawh dun puiah ka sawm nghal. WBC Youth title a fight theih nan khan Bangalore, Dubai leh Mumbai-ah inhnek ka buatsaihsak. Mumbai-a a inhnek ṭumah chuan Vanlalawmpuia pawh a tel," tiin Vanglaini a hrilh.

Boxing promoter-te hian an hnuaia boxer-te hi inhnekna tur an buatsaihsak bakah hian an zinna senso leh hotel thlenna thlengin an tumsak ṭhin. R. Dengṭhuama Hall-a WBC Youth title thlen theih nan khan Kamal hian ṭum hnih Aizawl a rawn tlawh.

Kamal chuan, "Mizoin boxing an ngaina tih ka hriat khan ka lawm a, boxer ṭha zawk pawh la chhuak thei tur an ni. Sport minister, LPS leh coach Sete-a te nen thawhhona ṭha tak kan neih zarah inelna ṭha tak kan buatsaih a, a lawmawm takzet. An chungah pawh ka lawm hle," tiin a sawi.

Kamal a insawifiah
Boxing promoter Kamal chuan, "Ṭum hnih ka rawn zinnaah khan ka team-te ka rawn hruai a, mahni sum seng vekin ka rawn kal. Chutihrualin sum hloh huama ti ni mah ila pawisa hloh reng chunga boxing promote chu thil theih loh a ni. Aizawl-a WBC Youth Title neih a nih khan hlawkna ka tel lo," tiin a sawi.

Kamal chuan sawi chhun-zawmin, "Sports minister-in Sangtea nuai 10 a pek khan 30% ka dil a, min pe lo. Ka senso phuhruk nana ka tih a ni a, organiser dangte nen inremna mumal kan ziah loh vang a ni a, ka thiam loh a ni. Tunah erawh kan inremnaah sorkar aṭanga ham ṭhatna a dawng a nih pawhin Sangtea'n a hui vek tur thu kan ziak vek. Chu chauh chu a ni lo, Sangtea hian pay per view aṭang leh sponsor aṭanga sum hmuh aṭangin 10% a dawng dawn tih kan ziak," tiin Vanglaini a hrilh a, Indian boxer zingah Sangtea hi hetianga hamṭhatna dawng hmasa zinga mi a nih tur thu a sawi tel bawk.

Sangtea hamṭhatna chung-chang sawi zuiin Kamal chuan, "Sangtea hian hmasawn tur chuan tawnhriat nei ṭha hnuaia training a mamawh tawh. Mizorama a tih theih chu a zo tawh a, coach ṭha hnuaiah awm a mamawh. Dubai-ah coach ṭha leh training partner ṭha kan pe a, professional boxer ṭha pangngai ni thei kha world champion ni thei tura chher kan tum," tiin a sawi.

Khawruhlian tlangval hian WBC Youth title a lak hnuah professional fight a la hmachhawn leh lo a, October 23, Inrinni zana a inhnek tur hi a fight hmachhawn leh hmasak ber tur a ni. Sangtea hian professional fight vawi nga a hmachhawn tawhah hnehna a la chang vek a, a khingpuite ṭum hnih a knockout tawh bawk.