Real-in goal an surtir; Inter pawh an chak

Mak tak maia Sheriff Tiraspol laka an tlawm hnuah Real Madrid an insiamṭha lehnghal a, group stage-ah Champions League mangṭha an tum lo tih pholangin an mikhualna ramah Shakhtar Donetsk chu 5-0 in an sawp.

Real Madrid tan Vinícius Júnior chuan goal hnih a khung a, Sergiy Kryvtsov (own goal), Rodrygo leh Karim Benzema ten goal khat ṭheuh an khung bawk.

Shakhtar leh Real a zawna an hneh hnuah Sheriff Tiraspol an vannei reng thei lo a, an mikhualna ramah Inter Milan chuan 3-1 in an lo hneh. Real nen point ruk ve ve hmu mekin group hmahruaitu erawh an la nih chhunzawm zel.

Sheriff hian Inter tana Edin Džeko goal hmahruai khung chu Sébastien Thill hmangin chhanglet mah se Italian club-in Arturo Vidal leh Stefan de Vrij hmangin goal an khung leh a, a tawpah 3-1 in an chak.

Harhna chang Vinicius
Real-in khualmualah goal khung hnem mah se an goal hmasa ber khung turin Ukrainian club duhsakna an mamawh a, Lucas Vazquez cross aṭanga ball kal chu defender Kryvtsov chuan an lamah a tilut - goal dang lut loin chawlhlawk hman a ni.

Second half ṭan aṭanga minute ruknaah Vinicius-a'n goal a khung ṭan a, minute 56-naah defender pathum bum chungin a goal hnihna a khung leh bawk - tun season inelna hrang hranga match 11 a khelh aṭangin goal sarih a khung ta a, assist vawi nga a nei bawk.

Carlo Ancelotti enkawlna hnuaiah Vinicius-a'n a theihna tak tak a pholan chhunzawm zel a, Brazilian forward hian King Carlo a hrawn hma chuan Real tana season khata goal a khung hnem ber ṭumin goal ruk a khung!

Kum 21 mi forward hian a goal hnihna a khung hnuah Rodrygo khung tur a siamsak a, hun pek belhah Benzema chuan a belhchhah ve leh bawk - French forward hian tun season inelna hrang hrangah match 11 khela goal 11 khungin assist vawi riat a nei tawh.

Inter an vul
Serie A champion Inter Milan-in inelna hrang hrang an hmachhawn hnuhnung paliah vawi khat chiah chak an nei - Champions League-ah Shakhtar (0-0) an inhnehtawkpui a, Serie A lamah Atalanta (2-2) an draw a, an match hnuhnung berah Lazio (3-1) an ngam lo a, Sassuolo (2-1) an hneh chiah chhuan tur an nei.

Mahse, Thawhlehni zana Champions League inkhelah erawh Inter-in an theihna tak tak an pholang a, last 16 luh an la tum ve reng tih lantirin Sheriff an sawp - Moldovan club hneh hi sawi vul chuk a rem lo a ni mai thei a, mahse, Shakhtar (2-0) leh Real (2-1) a zawna hnehtu an nih avangin sawi nep an rem lo.

Inter tan Dzeko chuan minute 34-na lekah goal hmahruai a khung a, kum 35 mi striker-in tun season match 11 a khelha goal sarih a khungna a ni leh der tawh. Mahse, Sheriff hian Real laka chakna goal khungtu Thill hmangin minute 52-naah si phurh an rawn sut a, beiseina an nei hman.

Mahse, Inter-in tlawm an tum lo - goal an chhuah aṭanga minute rukna lekah kum 34 mi Vidal-a'n hmahruaina goal a rawn khung leh a, Dutch centre back De Vrij chuan minute 67-naah chak nemnghehna a rawn khung - Inter-in goal thum khungin hnehna an chang a, last 16 an mitthla ngam ve leh ta.