Lakers lakah Curry hoin Warriors an chak

Basketball inelna sang leh nghaihhlut ber NBA season thar an khel ṭan a, player ropui LeBron James awmna Los Angeles Lakers an chak lo nghal. Lakers hi Stephen Curry hoa khel Golden State Warriors lakah 121-114 in an tlawm.

Inkhel dangah champion lai Milwaukee Bucks chuan team ṭha Brooklyn Nets chu 127-104 in an hneh ve nghal a, regular season bul ṭanna aṭangin inkhel a hmuhnawm nghal takzet - nimina inlan team pali hi tun season chhunga thleng sang tura ngaih an ni bawk.

NBA season hi a kum 75-na a ni a, hripui vangin season hnih chhung entu awm mumal loa an khelh hnuah arena khatin entu an awm leh thei tawh; kuminah chuan tun hma lam zawng aia lian leh ropui zawk inelna chhawp chhuah an tum leh tawh a ni.

GSW an chak
Stephen Curry leh Klay Thompson inhliam lai khan Golden State hi an che hleithei lo, season hmasa khan Curry a lo kir a, hma an sawn leh deuh hret - Thompson erawh kuminah pawh bul a la ṭan thei rih lo.

Nimin zing inkhelah NBA Most Valuable Player vawi hnih ni tawh Curry hian a thiam thil a 'show' leh ṭan ta a, hun pawimawh laiin point a nei thei hle - point 21 a neih bakah rebound leh assist vawi 10 ve ve neiin triple-double hmangin season bul a ṭan.

Lakers lamin quarter hnuhnung ber an khelh laiin hma an hruai zuai a, mahse an basket an ven ṭhat tawk loh avangin a tawpah an hniam zawk. An thianpuipa James-a'n point 34 a nei a, Anthony Davis pawhin point 33 a nei, thlawptu an neih ṭhat tawk loh an tuar.

Lakers coach Frank Vogel chuan, "Tun anga kan khelh theih kha chuan sang tak kan thleng thei ang, mahse a pawimawh ber hnehna kan chang lo erawh a pawi," a ti. James leh Davis bakah hian Russel Westbrook an neih belh tawh a ni.

GSW thiampuipa Curry chuan, "A tir lamah khan ball kan hloh hnem lutuk a, kan tuar. Kan insiamṭhat hnuah erawh Lakers kan chelh muang ta deuh a, tun ṭuma kan chakna hi chu thawhhona ṭha vang liau liau a ni," tiin a sawi ve bawk.

Champion lai Bucks
Season hmasa khan Giannis Anteto-kounmpo-a'n ropui takin Milwaukee Bucks chu NBA champion a nihpui a, Phoenix Suns hneha nomawi an chawi hnuah season bul an ṭan leh - team ṭha Brooklyn Nets lakah an theihna pho langin an chak chhunzawm nghal.

Bucks tan nikum ang bawkin Antetokounmpo chu innghahna a ni leh dawn. Greek tlangval hian point 32 a neih bakah rebound vawi 14 a la a, ani bakah hian Khris Middleton (20 points) leh Pat Connaughton (20) ten an thlawp ṭha hle bawk.

NBA Finals MVP Antetokounmpo chuan, "Kan hlawhtlinna hmasa kha chu a zo tawh, tunah chuan lehkhabu thar ziak turin a bul kan ṭan leh ta. Kan thawhhona a ṭha a nih phawt chuan tun season bakah kum lo la awm leh turah pawh hlawhtlinna kan chan theih ka ring hial," tiin a sawi.

Nets erawhin buaina an la nei, an player pawimawh Kyrie Irving chu hri leng invenna (vaccine) la duh lo zinga mi a ni a, a hmel kan la hmu thei lo. Kevin Durant (32 points) hi player dang chunga leng a ni, mahse James Harden (20 points) hi a club hmasa lama a chet angin a la che chhuak lo.

Season hmasa khan Nets hian Irving, Durant leh Harden te an nei kawp tawh, mahse hliam leh harsatna hrang hrang vangin an player ṭha pathum hi an inlan rual tam lo hle; kuminah pawh a tir aṭangin an inlan kim thei lo lehnghal.