5 Star Man City

Manchester City chuan Thawhlehni zan khan Jan Breydel Stadium-ah mualneitu Club Brugge chu 5-1 in an sawp a, Pep Guardiola hoten inkhel an thunun hle.

Ṭan phat aṭangin Man City-in inkhel an thunun a, a khat mawi tawkin goal an khung. English club hian Belgian tlarhnung vawi tam an rum ṭhaih hnuah Joao Cancelo chuan striker tiha mawiin minute 30-naah goal hmahruai a khung.

Riyad Mahrez-a'n minute 43-naah a penalty hlawhchhuah chu goal-ah a chantir. Algerian forward hian minute 84-naah Man City goal ngana a khung leh a, Mahrez hian mawi zetin Belgian club offside trap a bum.

Minute 53-naah Mahrez leh Kevin de Bruyne ten mawi zetin Club Brugge tlarhnung an ṭhiat a, Kyle Walker-a'n a hmawr a bawk nalh hle.

Bench aṭanga rawn lut academy chhuak Cole Palmer chuan tawih zetin minute 67-naah Man City goal lina a khung a, hemi hnu hian Brugge tan Hans Vanaken-a'n siphurh sut ṭhen mah se a chak tur zawk chu a chiang vek tawh.

Pep Guardiola chuan Club Brugge lakah hian Phil Foden chu false nine atan a hmang a, English midfielder hian Cancelo goal hmahruai khung tur ṭha zeta a pass avangin false nine atan pawh a rintlak tihin a sawi theih.

Kum 19 mi Palmer-a'n sawi zui a hlawh a, English midfielder hian League Cup-ah a khung tawh a, Champions League-a a inlan hmasa berah a khung leh bawk. Spanish manager chuan Palmer chu player ṭha zawk a nih theih nan dawh theihna a mamawh thu inkhelh banah a sawi.