Europa League ; Napoli tan chak a ngai tawh
European football inelna sang pahnihna Europa League chu zaninah khelh a ni dawn a, nizan leh Thawhlehni zan khan club ṭhenkhat chu an lo inlan tawh - zanin hian Napoli, Lazio leh Premier League club West Ham an inlan dawn a ni.
Nizan khan Leicester City chuan Spartak Moscow an lenchilh a, result kan hre hman lo. Foxes hi Manchester United hneh hlim ni mah se Europa League lamah chuan group C mawngphah luahtu an ni, an chak a nih chuan hma an sawn ve hret ang.
A mak a na
Dar 12:30 hian Napoli chuan Legia Warsaw an mikhual ang. League chauh kan thlir a nih chuan Naples club hi European League lian panga zinga season bul ṭan fuh ber an ni. Luciano Spalletti naute hian Serie A match riat an khelh tawhah hnehna an la chang vek, table hmahruaitu an ni.
Europa League lamah erawh an la che fuh thei lo. Leicester City nen an inhnehtawk hnuin an mikhual Spartak Moscow an ngam lo a nih kha, knockout stage lut tur chuan zaninah an tan chak ngei a pawimawh tawh.
Team pahnih hi tun hmain vawi hnih an lo intawng tawh, hengah hian Napoli an chak ve ve. Mahse, Legia Warsaw hi tun season Europa League bika vawi hnih chak thei an ni a, zuam sual theih tak an ni dawn.
Italian club lamin an match hnuhnung zawka hnawhchhuah Mario Rui an chhawr thei dawn lo. Tun season inelna hrang hrang match kua a khelh aṭanga goal riat khung thei Victor Osimhen erawh a inlan thei dawn, ven ngun ngai tur bik a ni ang.
Hammers 100%
David Moyes-a'n Premier League atan team nghet ṭha tak a din thei a, a rah chhuah chu European football lamah pawh a chhawr zui - match hnih an khelh tawhah chak ve vein point ruk an hmu a, group H hmahruaitu an ni.
Hammers hian zanin dar 13:30 hian London Stadium-ah Belgian club Genk an mikhual dawn. Moyes-a'n Alex Kral a chhawr thei dawn lo, Vladimir Coufal leh Tomas Soucek te bakah Mark Noble dinhmun a chiang lo bawk, midang erawh harsatna nei an awm lo.
London club hian an league match hnuhnung berah Everton 1-0 in an hneh thei a, goal awmchhun khungtu Angelo Ogbonna bakah season duhawm hmang mek Michail Antonio te an awm avangin goal chu an khung theih mai a rinawm.
Tun hmain team pahnih hi an la intawng ngai lo, player an neih dan chhut chuan West Hman hi chak tura rinkai zawk an ni. Mahse European football khel pha chin chu team ṭha an ni a, fimkhur taka mikhual thlen chu a ngai dawn tho.
Laizo an phur
Maurizio Sarri-a'n beisei angin Laizo hi season bul a ṭan fuh pui lo, mahse tun hnaiah an insiam ṭha tawh. An league match hnuhnung berah phei chuan Serie A champion lai Inter Milan 3-1 in an hneh thei - Inter lakah hian Ciro Immobile, Felipe Anderson leh Sergej Milinkovic-Savic ten goal an khung.
Italian manager Sarri tana chanchin lawmawm chu a player zingah hliam an awm lo hi a ni. A duh ang takin a naute a remkhawm thei dawn tihna a ni a, hnehna an chang a nih chuan knockout stage luhna kawngka a inhawn zau dawn avangin thapui an thawh ngei a rinawm.
Chelsea a enkawl laia Europa League champion tawh Sarri chuan, "Ka naute hian inrintawkna an nei a nih chuan thil eng pawh an ti thei," tiin a lo sawi tawh, zaninah hian eng ang taka ṭha nge an nih tih chu fiah a ni dawn.
Marseille pawh tunlai chu an phur lai tak a ni. Jorge Sampaoli naute hian Ligue 1 lamah Lorient 4-1 in an hneh thei ve tho a, an tlarhma lam an hriam avangin Sarri tan Lazio tlarhnung remphui a ngai dawn.