A ṭul chuan ka tel lo mai ang - England captain

England captain Eoin Morgan chuan batting lama a che ṭha lo chhunzawm a nih chuan T20 World Cup atan pawh inpaih mai a hnial loh thu a sawi. Morgan hian kumin chhungin England tan T20-ah 82 runs chauh a siam a, chawhrualin 11.71 runs chauh a siam.

Kum 35 mi Morgan chuan, "Run ka siam tam lo a, captain hna erawh ka tlin viauin ka hria. A ṭul a nih chuan awl ṭum pawh ka neih a ṭul ang," tiin a sawi. Indian Premier League neih zawh takah hian Morgan hian Kolkata Knight Riders tan 133 runs chauh a siam a, chawhrualin 11.08 chauh ni pha mah se KKR hi final an thlenpui.

Thawhṭanni khan England hian World Cup atana inpuahchahnaah India an hneh lo a, he inkhelah hian Morgan hi chawl hahdamin Jos Buttler-a'n captain hna a chelh. Three Lions hian nizan khan New Zealand nen World Cup inpuahchahna match hnuhnung ber an khel a, result kan hre hman lo.

Three Lions hian World Cup match hmasa ber chu October 23, Inrinni zan dar 7:30 hian West Indies nen an inkhel dawn. Super 12-ah hian England hi Australia, South Africa leh Windies te nen an awm ho a, first round paltlang pahnihin an rawn belh leh dawn a ni.