Ajax-in Dortmund an sawp

Johan Cryuff Arena-ah Ajax-in an mikhual Borussia Dortmund chungchangah zahngaihna an lantir lo a, Thawhlehni zan khan 4-0 in an sawp. Champions League group C inkhel dangah Sporting Lisbon-in Besiktas 4-1 in an hneh ve bawk.

Ajax-in game ṭha bik an khel chhuak a, minute 11-naa an goal hmasa ber chu Dortmund captain Marco Reus-a'n an lama khung mah se goal li chauh an khung hi an vanduai zawk. Reus tauh luh hi Dusan Tadic-a'n freekick aṭanga a khung tihin a sawi theih a, Daley Blind-a'n minute 25-naah mawi zetin goal ban perin a pet lut.

Brazilian forward Antony-a'n minute 57-naah goal thumna a khung a, Sao Paulo aṭanga kum 2020-a Dutch club zawmtu hian chance ṭha dang a hlah. Tun season Champions League top scorer ni lai Sebastian Haller-a'n minute 72-naah Ajax goal lina a tauh goal leh bawk.

Ajax-in inkhel an thunun a, chance ṭha an insiam hnem bakah game mawi an khel. Borussia Dortmund an mualpho a, chutihrualin Erling Haaland erawh striker ṭha a ni tih pholangin ṭum hnih chance a insiam a, a vawi hnihnaah hian crossbar a pet per.

Dortmund hian hian November 3, Nilaini zanah Ajax an mikhual leh dawn a, an chak lo nawn a nih chuan group stage luh a harsat phah thei ang. Sporting Lisbon-in Ajax leh Dortmund an hneh loh hnuah Besiktas an hneh a, Portuguese champion hian point thum chauh la hmu mah se knockout stage lut turin beiseina sang tak an neih phah a ni.