Bangladesh an chak ta

Cricket ram ṭha zinga tel pha Bangladesh-in an match hmasa berah Scotland an hneh lo a, T20 World Cup first round paltlang lo thei dinmunah an ding hman.

Thawhlehni zanah erawh Bangladesh hi an insiamṭha a, inelna thlengtu Oman chu 26 runs-in an hneh. Muscat-a inkhelah Bangladesh-in bat hmasain 153 runs an siam a, Oman hian 127/9 runs chauhin chhanglet.

Bangladesh tan Shakib Al Hasan a che ṭha a, ball 29 lekah 42 runs a siam zarah dinhmun ṭhaah an din phah. Oman tan opener Jatinder Singh-a'n 40 runs siam ve bawk mah se Shakib Al Hasan-a'n a vawm hlum.

Kum 34 mi Shakib hi khawvel all rounder ṭha ber zinga chhiar a ni phak a, Indian Premier League-ah pawh player langsar a ni pha. Oman an hneh ṭum hian Shakib hi man of the match-ah thlan a ni a, bowling lamah pawh 28 runs pein wicket thum a la bawk.

Inkhel dangah Scotland (165/9)-in Papua New Guinea (148) chu 17 runs-in an hneh a, point li hmuin group hmahruaitu an ni. Zanin dar 7:30 hian Scotland-in Oman an hmachhawn dawn a, heta chak zawk hian hmun ruak pakhat an hnawh khat a rinawm.

Bangladesh hi tun dinhmunah pathumnaah awm mah se vawiin tlai dar 3:30-a an hmachhawn tur Papua New Guinea hi table mawngphaha awm an ni a, NRR siam ṭhat nan an hman theih dawn avangin Tigers hi chu Super 12 lut tura rinkai ber an la ni tho.