Olympic meichherin Japan ram a thleng

Infiamna khawmpui lian Tokyo Olympic 2020 chu a hun pangngaia kaltlang pui tumin hma lak zel a ni a, nimin khan Olympic meichher chuan inelna neihna hmun tur Japan ram a thleng ta.

March 12, Ningani khan Olympic bul inṭanna Greece-ah meichher hi chhit ṭan a ni. Kum 2011 a Tsunami vanga chhiatna nasa tak tawktu Matsushima Air Base, Miyagi province-ah a bik taka ruahman thlawhtheihna hmanga phurh thlen a ni.

A hmunah mipui an pungkhawm lo a, thlan bikten an lo hmuak. Japanese Olympian Saori Yoshida leh Tadahiro Nomura te chuan meichher hi lo la kaiin, meichher chhit tur 'cherry blossom' anga duansa chu chief organiser Yoshiro Mori-a'n thu a sawi zawhah a chhi kai.

Ruahmanna hmasaah chuan Olympic meichher hi mipuiin an lo hmuak tur a ni a, tualchhung naupang thlan bik 200 an awm bawk ang. Mahse, Covid-19 vangin tunlaiah mipui punkhawm loh a ṭha a, naupang kal tur pawh hi ṭhulh a ni.

Yoshiro Mori chuan, "Naupang rilru fim takten hlim takin Olympic meichher hi an lo hmuak tura tih a ni a, mahse an himna tur ngaihtuah niin in lama an awm a ṭha zawk," tiin a sawi tawh. Japan hian hri leng hi an theihtawpin an do let a, hneh an tum ruh hle.

Tokyo 2020 CEO Toshiro Muto chuan, "Ram chhunga Olympic meichher ken kual hi kan tana thil ropui tak a ni dawn, chutih rualin fimkhur leh uluk taka kalpui a ni ang," tiin an rama hun an hman chhunzawm dan tur a sawi bawk.

Olympic hi nipui laia neih tur a ni dawn a, Europe leh United States lam aiin boruak a lum dawn hle. Japan hian khaw lum lutuk pawh tih ziaawm an tum hial, nipui lai a nih avangin coronavirus pawh khaw vawt ai chuan a hlauhawm loh zawk.

Infiamnaa peng hrang hrangten an inelna neih hun an sawn a, a ṭhen chu ṭhulh hial a ni hlawm. Boruak rip tak in mun mek karah hian Olympic kaltlangpui duhtu leh ṭhulh/sawn duhtu pawh an awm, ngaihdan a inang thei rih lo.

International Olympic Committee (IOC) chu thutlukna siam nan a la hma deuh niah an ngai. World Athletics chief Lord Coe pawhin IOC ngaihdan ṭawmpuiin, "Eng pawh thleng thei a la ni, Olympic neih loh tua tih ngawt nan pawh a la hma deuh.

"Thu thar hriat chakin infiammi leh fans lamin an beng an chhi reng. Mahse, keini lam aṭang chuan thu mum a la awm thei rih lo," a ti. IOC president Thomas Bach pawhin infiammite hriselna an ngaih pawimawh thu a lo sawi ve tawh bawk.

IOC leh Japan inrem danah chuan Olympic hi nipui laia neih ngei ngei tur tih a awm chuang lo, a hun pawh sawn theih a ni. Amaherawhchu 'Summer Olympic' a nih avangin ṭum dangah chuan nipui laiin an nei ṭhin a, a hmun ngaiah 'Winter Olympic' an thleng zui leh ṭhin.