United-in hlawh pek an tiam

Manchester United chuan coronavirus vangin inkhelh an ṭhulh zel emaw entu awm loa emaw khelh pawh ni se an inkhelh nia an mi chhawr mi 3,000 hnenah hlawh an pek tho tur thu an puang.

Football Association chuan April 30 thleng Covid-19 vangin inkhelh theih a nih loh tur thu an puang a, United erawhin an mi chhawrte chu hlawh an pek chhunzawm tur thu an sawi thung. Premier League an khel zo a nih chuan United hian Old Trafford-ah league match li khelh tur an la nei a, an hnathawkte hlawha an pek tur hi pound maktaduai khat vel a ni ang.

United executive vice-chairman Ed Woodward chuan, "Old Trafford-a nuam taka inkhel entuten hun an hman theih nan kan hnathawktute an thawk ṭha ṭhin hle. Tuna hun harsa tak kan tawh lai hian thlamuan an mamawh a, eng hun pawh tawng ila an lawmman kan pe dawn," tiin an hnathawkte tan thu hriat nuam a sawi. United striker Marcus Rashford pawh FareShareUK nen thawk hoin naupang zawkte ṭanpui nan sum ṭhahnem tak a thawh a, school chawlh vanga harsatna tawkte eitur a pe.