Sadio Mane: Mi thawkrim, puitu leh mi ropui chu

"I pheikhawk kha en rawh, engtinnge i inkhelh theih ang? Kekawrbul pangngai pawh i nei lo a maw?" tih chu Sadio Mane-a'n football hmanga eizawng tura thutlukna a siam hnua zawhna dengkhawng tak a dawn chu a ni. 

Mahse, footballer nih duhna thinlung neitu Mane a beidawng lo. Liverpool forward hian, "Ka Pu, ka thawmhnaw neih ṭhat ber nen ka rawn pen chhuak a, ka theihna pholan hi ka duh ber chu a ni," tiin a chhang mai - a tumah a chiang. 

Hetihlai hian Mane hi kum 15 mi lek a la ni a, trial nei tura a hmun pan hi an khua aṭanga a hlat zawng chu kilometre 800 chuang daih a ni. Mane chuan, "Ka thawmhnaw ṭha ber nena kal ka nih thu ka hrilh chuan coach chuan mak ti zetin min en a, chutihlaia a hmel chu en ula mak in ti ve tho ang," a ti! Mahse, tumruhna, theihna leh thiamna te hi thawmhnaw hak hmanga hrilhfiah chi a ni lo. Academy-a inzir turin Mane chu lak a ni a, football ngainatu zingah, "Sadio Mane i hria em?" tia zawhna inpek a ngai ta lo. 

Mane-a luhna academy hi Generation Foot tia hriat lar a ni a, he academy hian Diafra Sakho leh Papiss Cisse te pawh lo chher chhuak tawhin mi tam tak tan kawng a hawnsak. Sadio chuan, "Kawngpuiah a ni emaw, remchang ka hmuhna hmun apiangah chuan ka inkhel zel mai. Kum hnih thum vel lek ka nih aṭangin ball hi ka nunah a bet tlat tawh. 

"Ka len hnuah kan ram team inkhel en turin ka kal fo ṭhin. Kum 2002 World Cup quarterfinal kan luh khan Senegal chu football chanchinin a khat a, ka tan erawh khami hma khan ka nun chu football a ni daih tawh," a ti. 

Mahse, Mane hi a chhungte chuan inkhelh an phalsak lo - theihtawp a chhuah hnuah a hmin hram a, amah tuipui em em tu 'Putea' a nei hlauh chu a vanneihna a ni tel bawk. 

Mane-a'n thiamna leh tum ruhna a neih miau avangin hmanni lawk boot leh kekawr bul hak tur mumal pawh nei lo kha khawvela footballer hlawh hnem ber pawl a ni a, club ropui Liverpool tana player pawimawh a ni ta hial. 

Generation Foot leh Liverpool inkarah Mane a thang rei lo - kum kua bak hun a hmang lo! Hetih chhung hian Metz, Red Bull Salzburg leh Southampton tan a khel hman. 

Mane hian Metz pana a kal hmain Dakar khawpuia an chhungte a bel chawt a - an ina a thlen hmasak ber chu a chhungte nen hian an inhmelhriat vawi khatna a ni! Inthlahrung takin Mane a khawsa a, tunah chuan Dakar khawpuia a chen ṭhinnate hian, "Kan hnenah a awm ṭhin asin," tiin chhuang takin an sawi tawh thung ang. 

Liverpool fapa Senegal player-te ngaisang taka en ṭhintu khan a ngaihsan ṭhinte tih ang chu a ti ve zel a, Liverpool tan hial khelin an tih phak ngai loh a ti a, khawvela footballer ṭha zingah a hming lam hmaih a ni ngai ta lo. 

Champions League, UEFA Super Cup leh FIFA Club World Cup nomawi a chawi tawh a, Premier League nomawi chawi turin match hnih chiahin a dang ta bawk. 

Mahse, hetiang ang taka hlawhtlinna, sum leh ropuina a hlawh chhuak chung hian Mane hian a seilenna a theihnghilh ngai lo a, midangte aia ropui zawkah a in dah ngai lo - a ṭul hunah chuan zun in pawh a ti fai ve mai!

Muslim sakhaw vuantu Mane hi Nikum September khan Mosque (Muslim Biak In)-a zun in a ti fai lai hmuh a ni a, internet lamah a darh nasa hle. 

Mane hi zun in a tihfai chhan hi zawh a ni a, maktaduai tel hlawhtu footballer khawsak dan hian mak tih a hlawh. Mane chuan, "Ni tin vawi nga ka ṭawngṭai ṭhin a, mosque-ah ka kal ṭhin. "Vawi khat chu Ghana lam mi ṭhian 

ṭha tak ka chhar a, ka ina thingpui in turin ka sawm. Mahse, zun in tihfai a ngaih thu min hrilh a, ka pui ve a ni mai. "Mi pakhatin video-in a lo la a, online-a tar chhuak lo turin ka intiamtir nghe nghe. Mahse, a lo dah chhuak leh tho si a ni," a ti a, midang ang tho a nih thu leh mite tih ṭhin ang ti a nih ve mai thu a sawi. 

Mane hian naupang rethei tak tak ten football an khelh ve theih nan an thuam tur a tumsak ṭhin a, damdawi in leh school lamah pawisa a thawh a, a inhmang nasa hle. 

Mane hnathawh ropui tak an sawi ṭhin chu Senegal-a an khaw te tak te, Bambaly tana a hnathawh chu a ni - he khuaa chhungkaw tinte hi thlatin £70 (Rs. 6,281)-in a pui ṭhin a, an tan chuan pathian a ni!

Nikum lama Africa Cup of Nations an khelh zawh khan Mane hian hmun nuam leh changkanga chawlh hman thlang loin  €2,70,000-a thawhna school tlawh a thlang zawk. Mane hian football vanga a thil neih te chu harsa taka a thawhchhuah a ni tih a theihnghilh lo a, holam taka hman a tum lo. 

Senegalese forward chuan, "Engvangin nge Ferrari 10 ngawt ka neih kher ang? Rangkachaka luan sana 20 chuang ka duh lo a, thlawhtheihna pahnih neih a ṭulna ka hre lo bawk. Heng thilte hian ka tan eng thil ṭha mah a hring chhuak lo. "School leh Stadium ka sa a, mi harsa te tan hak tur thawmhnaw leh ei tur ka sem ṭhin. Mite angin thiamna sang tak ka nei lo a, an thil neih ang tam tak neih loh ka nei bawk. Mahse, football aṭanga ka hlawhchhuah hmanga midangte ka pui thei hi ka ngai hlu a ni," a ti!

Nikum khan Mane hi phone screen khi keng chunga inkhel tura khelmual a pan lai thlalak hmuh a ni a, hei pawh hi internet lamah a darh chak leh pek hle. Pa inngaitlawm Mane hrechiangtu ten amah fak nan an hmang zui a, a hlawh zat ngaihtuahin a phone hman chu 'mak' tiin an thlir. 

Mane chuan, "Iphone 11 hi Gini Wijnaldum-a min pek a ni a, kan inṭhianna chawimawi nan hman rih ka duh a ni," a ti sam leh et! Mane hian darkar khat pawh tling loah iphone 11 man hi chu a thawk chhuak a, mahse a ṭhianpa pek a nih avangin a ngai hlu - thawhchhuah nei loa phone manto lek nen chuan kar a hla deuh a ni e, ka u!