Indian Premier League Chennai Super Kings-in final an lut
Indian Premier League-in a tawp lam a hnaih tawh a, Thawhlehni zan khan qualifier 1-ah Chennai Super Kings chuan wicket hniha Sunrisers Hyderabad hneh chungin final an lut.
Chennai club hi eirukna/thamna thubuai avanga kum hnih ngawt IPL khel thei loa hrem an nih hnuah kuminah an rawn kir leh a, final an lut lehnghal–IPL season kua an inlana vawi sarih final an luhna a ni thei!
CSK tan final-a player langsar chu Faf du Plessis a ni a, South African batsman hian run 67 siamin 19.1 over-ah target a umphak pui–a tawp thlengin a out lo.
SRH an chuai
Sunrisers Hyderabad an chuai tih loh rual a ni lo. League match thum chauh khelh tur an neih khan playoff an lut tih a chiang tawh a, mahse an league match hnuhnung pathumah hian an tlawm vek thung!
Team dang beisei phak loh avangin qualifier 1 khel tur erawhin pakhatna dinhmun an luah ta tho a, a pawi ber zawk erawh league match tawp lama an khelh chhiat kha final lut tur zawnnaah meuh pawh an la thlah lo.
Hyderabad club tan hian opener Shikhar Dhawan chu run pawh siam loin a out nghal a, run 43 siama a tawp thleng rawn dam Carlos Brathwaite
awm lo se an mualpho khawp ang–over 20-ah run 139 an tlin hram a, wicket sarih an hloh.
Hei le Faf!
Chennai club-in bul an ṭan ropui lua bik lo–Dhawan tih dan a thik emaw ni tih mai turin opener Shane Watson chu run pawh siam loin a out ve nghal a, SRH tan beiseina a nung hman.
Mahse, Hyderabad club hlim chhung erawh a rei lo. Watson nena rawn pen chhuak hmasa Faf du Plessis-a'n a ṭhianpa out hnuah mawhphurhna a la a, South African batsman vawm out dan SRH bowler ten an hre lo.
Faf hian run 67 vaw chhuak turin ball 42 chiah a mamawh a, batsman dang out phuk phuk mah se a dingchang tlat–over 19.1-ah an chak ta nge nge a, May 27-a final khel turin an ticket an lei fel der ta.
SRH beiseina
Sunrisers-in qualifier 1-ah hnehna an chan zawh loh leh tak avangin IPL-a an match hnuhnung pali-ah an tlawm tihna a ni a, final luh beiseina an neih chhi nung turin an khelh chhiat zawn an bansan a ṭul.
Hyderabad tan beisei erawh a la tawp lo, qualifier 2 an la khel leh dawn. Nizan eliminator-a Kolkata Knight Riders leh Rajasthan Royals inkhela chak zawk zawk chu SRH hian qualifier 2-ah final luh a inchuhpui leh dawn.
He thu buatsaih lai hian result kan hre hman lo.